Վրաստանի վարչապետ Իրակլի Կոբախիձեն վրացական «Առաջին ալիքին» տված հարցազրույցում հայտարարել է, որ Վրաստանի համար առանձնահատուկ կարևորություն ունի տարածաշրջանի երկրների՝ Ադրբեջանի, Հայաստանի և Թուրքիայի հետ հարաբերությունների խորացումը, ինչպես նաև Կենտրոնական Ասիայի երկրների հետ կապերի զարգացումը, այդ թվում՝ տարանցման ոլորտում։ Նրա խոսքով՝ հատկապես կարևոր է տարանցման և կապակցվածության զարգացումը, ինչը հնարավոր չէ առանց այս երկրների համագործակցության։
Կոբախիձեն նշել է, որ Թուրքմենստանում Ադրբեջանի վարչապետի հետ ունեցել է շատ բարեկամական հանդիպում։
«Ընդհանուր առմամբ, Ադրբեջանը մեր առանձնահատուկ բարեկամն է, կառավարությունների միջև հարաբերությունները բացառապես բարեկամական են, և այդ պատճառով որևէ հարցի շուրջ մեզ համար դժվար չի լինի ընդհանուր լեզու գտնել», – նշել է նա։ Վրաստանի վարչապետի խոսքով՝ բանակցությունների առարկա է այն, թե վերջնական արդյունքում ինչ ձևաչափով կիրականացվի Ադրբեջանից տարանցումը Վրաստանի տարածքով։
«Մեզ համար լիովին ընդունելի են ադրբեջանական կողմի շահերը, ինչպես նաև հայկական կողմի շահերը։ Մենք ունենք մեր սեփական շահերը, և կարծում եմ, որ բանակցությունների հիման վրա հեշտությամբ կգտնենք այն լավագույն ճանապարհը, որը կբավարարի երեք երկրների շահերը», – նշել է Իրակլի Կոբախիձեն։
Նա նաև անդրադարձել է «Հարավային գազային միջանցքի» պայմանագրի ժամկետի ավարտին վերաբերող հարցին՝ ընդգծելով, որ բոլոր թեմաների շուրջ ընթանում են բանակցություններ։ Նրա խոսքով՝ Վրաստանը Ադրբեջանի հետ ունի բացառապես բարեկամական հարաբերություններ, ինչը հիմք է տալիս լավատեսության համար, և վրացական կողմը հույս ունի, որ կհասնի երկու կողմերի համար ընդունելի և շահավետ համաձայնության։
Հետևեք մեզ տելեգրամում
