2026 թվականի հունվարի 1-ից Վրաստան մուտք գործելու համար սահմանվում է առողջության և դժբախտ պատահարի պարտադիր ապահովագրության պահանջ։ Միաժամանակ որոշ խմբեր ազատված են այդ պարտավորությունից։
Այս մասին «Արմենպրեսս»-ին հայտնել են ՀՀ Պետական եկամուտների կոմիտեի տեղեկատվության և հասարակայնության հետ կապերի բաժնից։ Պարտադիր ապահովագրության պահանջից ազատված են Վրաստան մուտքի դիվանագիտական կամ հատուկ արտոնագիր ունեցողները, դիվանագիտական, պաշտոնական, ծառայողական կամ հատուկ անձնագիր կրողները, Վրաստանում հավատարմագրված դիվանագիտական առաքելությունների, հյուպատոսական հիմնարկների և միջազգային կազմակերպությունների ներկայացուցիչները, ինչպես նաև նրանց ընտանիքի անդամները։ Ազատված են նաև այն անձինք, որոնց մուտքը Վրաստան նախատեսված է միջազգային համաձայնագրերով կամ պայմանագրերով, ինչպես նաև միջազգային ավտոմոբիլային բեռնափոխադրումներով և ուղևորափոխադրումներով զբաղվող վարորդները։
Մնացած զբոսաշրջիկների համար ապահովագրությունը պետք է ներկայացվի ֆիզիկական կամ էլեկտրոնային տարբերակով՝ վրացերեն կամ անգլերեն լեզվով։ Այն կարող է տրամադրվել ինչպես վրացական, այնպես էլ արտասահմանյան ապահովագրական ընկերությունների կողմից և պետք է ունենա առնվազն 30 հազար լարիի ապահովագրական սահմանաչափ։
Ապահովագրությունը պարտադիր է Վրաստանում գտնվելու ամբողջ ժամանակահատվածում և պետք է պարունակի պայմանագրի կողմերի, ծածկույթի տարածքի, ապահովագրված ռիսկերի, ապահովագրության ժամկետների և ապահովագրական գումարի վերաբերյալ անհրաժեշտ տվյալներ։
Հետևեք մեզ տելեգրամում
