Մենք ուզում ենք և աշխատում ենք նաև Սիրիայի հետ․Փաշինյանը վարձկաններին վերադարձի մասին

ՀՀ վարչապետ Նիկոլ Փաշինյանը հայտարարել է, որ Ադրբեջանից 4 հայ գերիների վերադարձն ու Հայաստանում 44-օրյա պատերազմի ընթացքում վարձկանության մեղադրանքով դատապարտված սիրիացի քաղաքացիների վերադարձը միմյանց հետ կապ չունեն։

«Այդ երկու իրադարձությունները իրար հետ կապ չունեն։ Մենք ուզում ենք և աշխատում ենք նաև Սիրիայի Արաբական Հանրապետության հետ մեր հարաբերությունների հետագա զարգացման ուղղությամբ, այդ թվում՝ հույս ունենք, որ այդ որոշումը, որը բարեկամական որոշում է Սիրիայի նկատմամբ, Սիրիայի հայ համայնքի շուրջ մթնոլորտը ավելի բարենպաստ կդարձնի»։

Հիշեցնենք, որ 2026 թվականի հունվարի 14-ին Հայաստանի Հանրապետությունում ցմահ ազատազրկման դատապարտված Սիրիայի Արաբական Հանրապետության քաղաքացիներ Յուսեֆ Ալաաբեթ ալ-Հաջին և Մուհհռաբ Մուհամմադ ալ-Շխերին, Թուրքիայի Հանրապետության միջոցով փոխանցվել են Սիրիայի Արաբական Հանրապետության իրավասու մարմիններին՝ իրենց նկատմամբ կայացված դատավճիռների հետագա կատարումը իրենց քաղաքացիության պետությունում շարունակելու նպատակով: Այդ վարձկանները գերեվարվել են Արցախյան 44-օրյա պատերազմի ընթացքում ՀՀ ԶՈւ զինծառայողների կողմից։ Նույն օրը Ադրբեջանը Հայաստանին էր հանձնել 4 գերիների՝ Գևորգ Սուջյանին, Դավիթ Դավթյանին, Վիգեն Էուլջեքջյանին և Վագիֆ Խաչատրյանին։