Սիրիայի նախագահ Ահմադ ալ-Շարաան աշխատանքային այցով մեկնել է Ռուսաստանի Դաշնություն, հանդիպել նախագահ Վլադիմիր Պուտինի հետ։
Օրակարգում ներառված էին տարբեր ոլորտներում երկկողմ հարաբերությունների զարգացումը և դրանց հեռանկարները, ինչպես նաև Մերձավոր Արևելքում տիրող իրավիճակը։
Պուտինը նշել է, որ ալ-Շարաայի վերջին այցից հետո երկու երկրների տարբեր գերատեսչություններ ակտիվ աշխատել են, մի շարք լավ նախաձեռնություններ ունեն նախատեսված արդյունաբերության, մարդասիրական օգնության, սպորտի, բժշկության և շինարարության ոլորտներում։
«Մենք ուշադիր հետևել ենք Սիրիայի տարածքային ամբողջականությունը վերականգնելու Ձեր ջանքերին։ Ուզում եմ շնորհավորել Ձեզ, քանի որ այս գործընթացը նոր թափ է հավաքում։ Մենք միշտ պաշտպանել ենք Սիրիայի տարածքային ամբողջականությունը վերականգնելու գաղափարը. դուք գիտեք դա, և մենք աջակցում ենք այս ուղղությամբ Ձեր բոլոր ջանքերը»,-ասել է ՌԴ նախագահը։
Իր հերթին, Սիրիայի նախագահ Ահմադ ալ-Շարաան ընդգծել է սիրիա-ռուսական հարաբերությունների կարևորությունը, դրանց զարգացումը վերջին մեկ տարվա ընթացքում՝ նշելով Ռուսաստանի դերը Սիրիայի միասնության և կայունության աջակցության, ինչպես նաև ամբողջ տարածաշրջանում անվտանգության և կայունության ամրապնդման գործում։
Նշենք, որ սա ալ-Շարաայի երկրորդ այցն է Մոսկվա Սիրիայի ժամանակավոր կառավարության ղեկը ստանձնելուց հետո։
Հետևեք մեզ տելեգրամում
