Թուրքիայի արտգործնախարար Հաքան Ֆիդանը հայտարարել է, որ Անկարան ստիպված կլինի միանալ միջուկային սպառազինությունների մրցավազքին, եթե տարածաշրջանում նոր պետություններ միջուկային զենք ձեռք բերեն։
CNN Türk-ին տված հարցազրույցում նա ընդգծել է, որ Թուրքիան հետաքրքրված չէ տարածաշրջանային ուժերի հավասարակշռության կտրուկ փոփոխություններով։ Ըստ նրա՝ միջուկային զենքի տարածումը կարող է շղթայական ռեակցիա առաջացնել։
«Այս հարցը պետք է դիտարկել ընդհանուր ռազմավարական իրավիճակի համատեքստում։ Անկեղծ ասած, մենք չենք ցանկանում տարածաշրջանում տեսնել դրամատիկ փոփոխություններ, որոնք կարող են խախտել ուժերի ներկայիս հավասարակշռությունը։ Օրինակ՝ Իրանի հետ խնդրահարույց հարցեր ունեցող երկրները կսկսեն ձգտել միջուկային զենքի։ Եվ մենք, հավանաբար, ստիպված կլինենք միանալ այդ մրցավազքին։ Հետևաբար, չեմ կարծում, որ դա շատ օգտակար կլինի տարածաշրջանի համար», – ասել է Ֆիդանը։
Հետևեք մեզ տելեգրամում
