Այն պահից, երբ Հայաստանում կգործեն բիոմետրիկ անձնագրերը, իսկ դա սպասում ենք 2027-ի աշնանը, «Զվարթնոց» օդանավակայանում ու մյուս սահմանային կետերում պետք է գործեն «անշփում» անցման ուղիները. այդ մասին խորհրդարանում հայտարարել է վարչապետ Նիկոլ Փաշինյանը։
«Բիոմետրիկ անձնագիր ունեցող, կենսաչափական անձնագիր ունեցող քաղաքացիները պետք է գնան ուղղակի իրեց կենսաչափական տվյալները։ Այսինքն՝ առանց կոնտակտի պետք է գնան օդանավ մտնեն կամ դուրս գան, կամ սահմանը հատեն»,- նշել է Փաշինյանը:
Փաշինյանը նաև հավելել է, որ Հայաստանում «անշփում անցման» համակարգի ներդրման համար պետք է ամերիկյան կողմի աջակցությունը։
«Պետք է, որ Միացյալ նահանգները, որը տիրապետում է այդ տեխնոլոգիաներին, այդ տեխնոլոգիաներով կիսվեն մեզ հետ»,- ընդգծել է նա։
Ըստ Փաշինյանի՝ ինքը նախօրեին այդ հարցով քննարկում է ունեցել Երևանում գտնվող ԱՄՆ փոխնախագահի հետ. «Մեր գործընկերներից ստացել եմ հավաստիացում, որ այդ տեխնոլոգիաներով կկիսվեն Հայաստանի հետ»,- նշել է վարչապետը:
Հետևեք մեզ տելեգրամում
