Հայաստանի ու Վրաստանի էկոնոմիկայի նախարարները քննարկել են առևտրային հարցեր

Վրաստանի էկոնոմիկայի և կայուն զարգացման նախարար Մարիամ Քվրիվիշվիլին հանդիպում է ունեցել Հայաստանի էկոնոմիկայի նախարար Գևորգ Պապոյանի հետ։ Կողմերը քննարկել են երկրների միջև տնտեսական համագործակցության հարցերի լայն շրջանակ։

Մարիամ Քվրիվիշվիլին ընդգծել է, որ Հայաստանը Վրաստանի առանցքային առևտրատնտեսական գործընկերներից է, սակայն համագործակցության հետագա ընդլայնման, հատկապես ներդրումների ներգրավման ոլորտում, դեռևս մեծ ներուժ ու չիրացված ռեսուրսներ կան։ Նախարարները փաստել են, որ վերջին տարիներին Վրաստանի և Հայաստանի միջև տնտեսական հարաբերությունները կայուն վերելք են ապրում։

Հայաստանն ավանդաբար պահպանում է իր տեղը Վրաստանի գլխավոր առևտրային գործընկերների շարքում. ըստ 2025 թվականի տվյալների՝ այն 9-րդն է ընդհանուր առևտրաշրջանառության ծավալով և 5-րդը՝ արտահանման ցուցանիշով։ Հանդիպմանն առանձնակի անդրադարձ է կատարվել նաև զբոսաշրջության ոլորտում կապերի խորացմանը։