Թուրքական «Turkiyetoday.com» կայքում հրապարակվել է Զ. Գ. Օզփընարի՝ «Թուրքական ավիաուղիները նոր ուղղություն են ուրվագծում Թուրքիա-Հայաստան հարաբերությունների կարգավորման գործում» վերնագրով հոդվածը, որում շեշտվում է, որ Թուրքիայի ազգային ավիափոխադրողի մուտքը Հայաստան կարող է դառնալ ոչ միայն տնտեսական, այլ նաև քաղաքական և հոգեբանական շրջադարձային կետ։
Հոդվածում նշվում է, որ «Թուրքական ավիաուղիների» կողմից Երևան-Լոս Անջելես ուղիղ չվերթի շուրջ բանակցությունները դիտարկվում են որպես երկար ժամանակ սառեցված հարաբերությունների հնարավոր կարգավորման կարևոր ազդակ։ Ըստ հեղինակի՝ 2026 թվականի մարտից դեպի Երևան ուղիղ չվերթների մեկնարկը և դրանց հաճախականության հետագա ավելացումը փաստացի նշանակում են երկու երկրների միջև օդային կապի վերականգնում։
Հեղինակը գործընթացը կապում է ՀՀ վարչապետ Նիկոլ Փաշինյանի կողմից առաջ քաշվող «Խաղաղության խաչմերուկ» նախագծի հետ՝ այն ներկայացնելով որպես Հայաստանի փակ աշխարհաքաղաքական վիճակից դուրս գալու և տարածաշրջանային տարանցիկ հանգույց դառնալու ռազմավարության մաս։ Նշվում է, որ հզոր միջազգային ավիափոխադրողի մուտքը կարող է նպաստել Հայաստանի ինտեգրմանը միջազգային օդային ցանցերին, խթանել ներդրումների ներգրավումը և զբոսաշրջությունը։
Միաժամանակ հոդվածում ընդգծվում է, որ Թուրքիայի ազգային ավիափոխադրողի գործունեությունը Երևանում կարող է ազդել նաև անվտանգության ընկալումների վրա՝ մեղմելով Թուրքիայի նկատմամբ ձևավորված բացասական պատկերացումները՝ տնտեսական փոխկախվածության աճի պայմաններում։
Առանձին ուշադրություն է դարձվում ԱՄՆ-ում, հատկապես Լոս Անջելեսում կենտրոնացած հայկական սփյուռքին։ Ըստ հեղինակի՝ եթե Երևան-Լոս Անջելես ուղղությամբ «Թուրքական ավիաուղիները» առաջարկի մրցունակ և մատչելի ծառայություններ, դա կարող է փոխել սփյուռքի որոշ շրջանակների վերաբերմունքը։
Հոդվածում նաև նշվում է, որ կարգավորման գործընթացը շարունակում է մնալ փխրուն՝ հաշվի առնելով Հայաստանի ներքաղաքական զգայունությունը և ռուսական գործոնի ազդեցությունը, սակայն ներկայիս միտումները վկայում են Երևանի՝ հարաբերությունների կարգավորման ուղղությամբ քայլեր կատարելու պատրաստակամության մասին։
Հետևեք մեզ տելեգրամում
