ՀՀ կառավարությունը առաջին անգամ պաշտոնապես հաստատել է, որ ռուս սահմանապահները հեռացվել են Հայաստան–Թուրքիա սահմանի «Ախուրիկ» անցակետից, այնտեղ ծառայությունը իրականացվում է ՀՀ ԱԱԾ սահմանապահ զորքերի կողմից։ Դա պարզ է դառնում ՀՀ կառավարության ծրագրի 2025 թվականի կատարողական զեկույցի ուսումնասիրությունից, հայտնում է Factor.am-ը:
Զեկույցում նշվում է. «2025 թվականի մարտի 1-ից Հայաստան-Թուրքիա պետական սահմանի «Մարգարա» անցման կետում ծառայություն են իրականացնում բացառապես ՀՀ ԱԱԾ սահմանապահ զորքերի զինծառայողները։ 2026 թվականի սկզբից Հայաստան-Թուրքիա պետական սահմանի «Ախուրիկ» անցման կետում ևս ծառայություն են իրականացնում միայն ՀՀ ԱԱԾ սահմանապահ զորքերի զինծառայողները․ ներկայումս չկա ՀՀ պետական սահմանի որևէ գործող անցման կետ, որը չի գտնվում ՀՀ ԱԱԾ ՍԶ լիարժեք վերահսկողության ներքո»։
Տարեսկզբին շրջանառվում էին տեղեկություններ «Ախուրիկ» անցակետից ՌԴ սահմանապահների դուրս գալու վերաբերյալ, սակայն իշխանությունները այդ լուրը չէին հաստատել։ Միայն Ախուրիկ համայնքի վարչական ղեկավարն է նշել, որ որոշ գործընթացներ իրականացվել են, այդ թվում՝ տարածքում տեղադրվել է ՀՀ պետական դրոշը։
Նշվել է նաև, որ ՀՀ ԱԱԾ-ն հունվարի սկզբին տվյալ տեղեկության տրամադրումը համարել է պետական գաղտնիք, մինչդեռ այժմ այդ մասին արձանագրվել է կառավարության պաշտոնական զեկույցում։
Հետևեք մեզ տելեգրամում
