Աբու Դաբիում բալիստիկ հրթիռի բեկորների ընկնելու հետևանքով մարդ է զոհվել

Արաբական Միացյալ Էմիրությունների մայրաքաղաք Աբու Դաբիում Պակիստանի քաղաքացի է զոհվել՝ հակաօդային պաշտպանության համակարգերի կողմից խոցված բալիստիկ հրթիռի բեկորների ընկնելու հետևանքով։ Այս մասին հաղորդում է Աբու Դաբիի Էմիրության մամուլի ծառայությունը՝ X սոցիալական հարթակում։ Նշվում է, որ հրթիռի բեկորները ընկել են Բենի Յաս շրջանում։

Նախօրեին հաղորդվել էր, որ Աբու Դաբիում ևս մեկ միջադեպի հետևանքով զոհվել է պաղեստինցի տղամարդ․ հրթիռը ընկել էր ավտոմեքենայի վրա։
Նույն օրը հարձակման էր ենթարկվել նաև ԱՄԷ-ի առանցքային նավահանգիստներից մեկը՝ Ֆուջեյրան, ինչի հետևանքով ժամանակավորապես դադարեցվել էր նավթի բեռնաթափումը։ Բացի այդ, մարտի 16-ի գիշերը Դուբայի միջազգային օդանավակայանի շրջանում անօդաչու թռչող սարքը վնասել էր վառելիքի պահեստարաններից մեկը։