ԱՄՆ նախագահ Դոնալդ Թրամփը Financial Times պարբերականին տված հարցազրույցում հայտարարել է, որ նախապատվություն է տալիս Իրանի նավթին տիրանալուն՝ հավելելով, որ այժմ դիտարկում է Իրանի վառելիքի արտահանման գլխավոր հանգույցի՝ Խարգ կղզու գրավման հնարավորությունը։ Փոխանցում է CNN-ը:
«Հնարավոր է՝ մենք վերցնենք Խարգ կղզին, հնարավոր է՝ ոչ։ Մենք շատ տարբերակներ ունենք»,- ասել է Թրամփը ։
Թրամփը բացահայտ քննադատել է նաև իր այն հայրենակիցներին, ովքեր դեմ են նման կոշտ միջամտությանը։ «Անկեղծ ասած, իմ ֆավորիտային տարբերակն Իրանի նավթը վերցնելն է, բայց ԱՄՆ-ում որոշ հիմար մարդիկ հարցնում են՝ ինչո՞ւ ես դա անում։ Նրանք պարզապես հիմար են»,- նշել է ԱՄՆ նախագահը։ Նա նաև հավելել է, որ նման քայլը կենթադրի ամերիկյան զինուժի տևական ներկայություն տարածաշրջանում, քանի որ Խարգ կղզին վերցնելու դեպքում ԱՄՆ ուժերը ստիպված կլինեն որոշ ժամանակ մնալ այնտեղ։
Խարգ կղզին Իրանի տնտեսության համար ունի կենսական նշանակություն, քանի որ դրա միջոցով է իրականացվում երկրի նավթի արտահանման շուրջ 90%-ը։ Հատկանշական է, որ ամերիկյան կողմն արդեն իսկ թիրախավորել է կղզու ռազմական ենթակառուցվածքները։ Մարտի 13-ին ԱՄՆ Կենտրոնական հրամանատարությունը հաղորդել էր 90 թիրախների խոցման մասին, որոնց թվում էին ծովային ականների պահեստներ, հրթիռային բունկերներ և այլ ռազմական օբյեկտներ։
Հետևեք մեզ տելեգրամում
