Հարավային Կորեան որոշել է մոտ օրերս հատուկ բանագնաց ուղարկել Իրան՝ քննարկելու Մերձավոր Արևելքում ստեղծված իրավիճակը, ինչպես նաև Հորմուզի նեղուցով այդ երկրի բոլոր նավերի անվտանգ անցման հարցը: Այս մասին հայտնել է CNN-ը։
Որոշումը կայացվել է Միացյալ Նահանգների և Իրանի միջև հրադադարի պայմանավորվածությունից հետո։ Հվ․ Կորեայի ԱԳՆ-ն հատուկ բանագնաց է նշանակել նախկինում Քուվեյթում դեսպան Չունգ Բյոնգ-հային։ Նրա նշանակմանը նախորդել էր Հարավային Կորեայի արտաքին գործերի նախարար Չո Հյոնի և Իրանի ԱԳ նախարար Աբբաս Արաղչիի հեռախոսազրույցը։
Ներկայումս Հարավային Կորեայի 26 նավ, այդ թվում՝ նավթատարներ, չեն կարողանում անցնել Հորմուզի նեղուցով։ Նավատորմային ընկերությունների ներկայացուցիչներն ու վերլուծաբանները նշում են, որ թեև հրադադար է հայտարարվել, իրավիճակի շուրջ անորոշությունը շարունակում է վտանգավոր դարձնել նեղուցով անցումը։
Հիշեցնենք, որ ապրիլի 7-ին Իրանն ու ԱՄՆ-ն հայտարարել էին երկշաբաթյա հրադադարի մասին: Ռազմական գործողությունների դադարեցումից բացի, պայմանավորվածություն էր ձեռք բերվել բացել Հորմուզի նեղուցը, որով անցնում է նավթի համաշխարհային արտահանման մոտ մեկ հինգերորդը։ Հրադադարից հետո Լիբանանում Իսրայելի ռազմական ռազմական գործողությունների ֆոնին իրանական մամուլը հայտնել է, որ նեղուցով երթևեկությունը սահմանափակումներով է տեղի ունենում:
Նշենք, որ Հարավային Կորեան հանդիսանում է ԱՄՆ-ի կարևոր դաշնակիցը և առանցքային դեր ունի այդ երկրի Հնդկա-Խաղաղօվկիանոսյան անվտանգության ռազմավարությունում։ Երկրում տեղակայված են շուրջ 28 հազար ամերիկացի զինծառայողներ:
Հետևեք մեզ տելեգրամում
