Ռուսաստանի Դաշնությունում Telegram մեսենջերի աշխատանքի խափանումները և արգելափակմանն ուղղված գործողությունները հասել են աննախադեպ ծավալների։ Ապրիլի 10-ի առավոտվա դրությամբ հավելված մուտք գործելու փորձերի ձախողման մակարդակը կազմել է 95 տոկոս։ Փոխանցում է Meduza-ն:
Ըստ լրատվամիջոցի՝ սա ՌԴ-ում նոր սահմանափակումների մեկնարկից ի վեր գրանցված ամենաբարձր ցուցանիշն է, ինչը վկայում է այն մասին, որ Telegram-ն այժմ ավելի ագրեսիվ է թիրախավորվում, քան WhatsApp-ը կամ Signal-ը։ Telegram-ի հավելվածի աշխատանքն աստիճանաբար վատթարացել է մարտի սկզբից, և շատերի համար այն գրեթե անհասանելի է դարձել առանց VPN ծառայությունների կիրառման։
Հատկանշական է, որ դեռևս 2025 թվականի ամռանից Ռուսաստանում սահմանափակվել էին Telegram-ի և WhatsApp-ի տեսազանգերի հնարավորությունները։ Ըստ տարբեր աղբյուրների՝ իշխանությունները ծրագրել էին մեսենջերն ամբողջությամբ արգելափակել մինչև ապրիլի 1-ը։ Արգելափակման գործընթացը կտրուկ ինտենսիվացել է մարտի 20-ին, երբ անոմալիաները հասել են 72 տոկոսի, ինչը նշանակում էր, որ հավելվածը հասանելի էր միայն երեք փորձից մեկի դեպքում։ Այժմյան ցուցանիշները փաստում են, որ հարթակը ՌԴ-ում հայտնվել է լիակատար արգելափակման եզրին։
Հետևեք մեզ տելեգրամում
