Ապրիլի 10-ին մարդկությունը պաշտոնապես թևակոխեց տիեզերական հետազոտությունների նոր փուլ։ ՆԱՍԱ-ի «Օրիոն» տիեզերանավը հաջողությամբ ավարտեց «Արտեմիս II» առաքելությունը և վայրէջք կատարեց Խաղաղ օվկիանոսում՝ Սան Դիեգոյի ափերի մոտ։
Սա առաջին մարդատար թռիչքն էր դեպի Լուսնի ուղղություն 1972 թվականից հետո, երբ ավարտվել էր «Ապոլլոն 17» առաքելությունը։ Շուրջ 53 տարվա դադարից հետո մարդիկ կրկին մոտեցան Լուսնին և վերադարձան Երկիր՝ փորձարկելով ՆԱՍԱ-ի նոր սերնդի տեխնոլոգիաները։ ՆԱՍԱ-ի գնահատմամբ՝ «Արտեմիս II»-ը կարևոր քայլ է դեպի հաջորդ փուլը՝ «Արտեմիս III» առաքելությունը, որի ընթացքում նախատեսվում է մարդու վայրէջք Լուսնի վրա։ Գործակալության երկարաժամկետ նպատակը Լուսնի վրա մշտական ներկայության ստեղծումն է և հետագայում՝ Մարսի ուղղությամբ ճանապարհի բացումը։
Թեև «Օրիոն» տիեզերանավը մոտեցել է Լուսնին և անցել նրա շուրջը, վայրէջք Լուսնի մակերևույթին չի կատարվել, քանի որ այն նախատեսված չէ այդ նպատակով։ Առաքելության հիմնական նպատակն էր ստուգել համակարգերի աշխատանքը իրական խոր տիեզերական պայմաններում՝ պատրաստվելով հաջորդ՝ ավելի բարդ փուլերին։
«Արտեմիս II» առաքելության անձնակազմը բաղկացած էր չորս տիեզերագնացներից՝ հրամանատար Ռիդ Ուայզման, օդաչու Վիկտոր Գլովեր, մասնագետ Քրիստինա Քոչ և Կանադայի տիեզերական գործակալության ներկայացուցիչ Ջերեմի Հանսեն։ Առաքելությունն առանձնահատուկ էր նաև իր կազմով․ Վիկտոր Գլովերը դարձավ առաջին սևամորթ տիեզերագնացը, ով մասնակցեց Լուսնին մոտ ուղևորությանը, Քրիստինա Քոչը՝ առաջին կինը, իսկ Ջերեմի Հանսենը՝ առաջին ոչ ամերիկացին նման առաքելությունում։
Լուսնին մոտեցման ժամանակ անձնակազմը հասել է ավելի քան 400,000 կիլոմետր հեռավորության Երկրից՝ դառնալով ամենահեռավոր մարդատար թռիչքներից մեկի մասնակից։
Վերադարձի փուլը եղել է ամենաբարդը։ «Օրիոնը» Երկրի մթնոլորտ է մուտք գործել մոտ 38,000 կիլոմետր ժամ արագությամբ և ենթարկվել է մոտ 2,700°C ջերմության։ Այս պայմաններում աշխատել է ջերմային վահանը, որը պաշտպանել է տիեզերանավը։
Մթնոլորտ մուտք գործելու պահին կապը Երկրի հետ ժամանակավորապես կորել է՝ պլազմային շերտի պատճառով, ինչը նման առաքելությունների բնական փուլ է։ Այնուհետև «Օրիոնը» աստիճանաբար դանդաղել է և պարաշյուտների միջոցով անվտանգ վայրէջք կատարել Խաղաղ օվկիանոսում։
Վայրէջքից հետո ՆԱՍԱ-ի և ԱՄՆ ռազմածովային ուժերի փրկարարական խմբերը մոտեցել են տիեզերանավին, ապահովել տարածքը և սկսել անձնակազմի դուրսբերումը։ Տիեզերագնացները տեղափոխվել են հատուկ նավ, որտեղ անցել են առաջին բժշկական ստուգումները։
Հետևեք մեզ տելեգրամում
