Իրանի Իսլամական Հանրապետությունը տարածաշրջանային հինգ երկրի՝ Հորդանանին, Սաուդյան Արաբիային, ԱՄԷ-ին, Կատարին և Բահրեյնին մեղադրել է ԱՄՆ-ի և Իսրայելի ռազմական գործողություններին աջակցելու մեջ և պահանջել նյութական ու բարոյական վնասի լիարժեք փոխհատուցում։ Այս պահանջով ՄԱԿ-ում Իրանի մշտական ներկայացուցիչ Սայիդ Իրավանին նամակ է հղել Անվտանգության խորհրդին: Փոխանցում է իրանական Tasnim լրատվական գործակալությունը:
Ըստ իրանական կողմի՝ այս հինգ պետությունները խախտել են միջազգային իրավունքի նորմերը՝ թույլ տալով օգտագործել իրենց օդային տարածքը կամ ռազմաբազաներն Իրանի դեմ հարձակումներ իրականացնելու համար։ Իրավանին ընդգծել է, որ որոշ դեպքերում այս երկրները նույնիսկ «ուղղակի մասնակցություն» են ունեցել Իրանի քաղաքացիական օբյեկտների դեմ իրականացված հարվածներին։
Նամակում նշվում է, որ 2026 թ. փետրվարի 28-ին Իրանը ենթարկվել է բացահայտ ագրեսիայի ԱՄՆ-ի և Իսրայելի կողմից, իսկ վերը նշված երկրների՝ հարձակվող կողմին սեփական տարածքը տրամադրելու դիրքորոշումն ինքնին հանդիսանում է ագրեսիայի ակտ։
Իրանը պաշտոնական ՄԱԿ-ից և նշված երկրներից պահանջում է.
- «Անհապաղ դադարեցնել միջազգային իրավունքի խախտումները և տարածքների տրամադրումը ագրեսորներին։
- Կրել միջազգային պատասխանատվություն ստանձնած պարտավորությունների խախտման համար։
- Ամբողջությամբ փոխհատուցել Իրանի կրած բոլոր նյութական և բարոյական վնասները»։
Հետևեք մեզ տելեգրամում
