Հայաստանի Ազգային ժողովի նախագահ Ալեն Սիմոնյանը Ստամբուլում հայկական մամուլի ներկայացուցիչների հետ հանդիպման ընթացքում անդրադարձել է Հայաստան-Թուրքիա ցամաքային սահմանի չբացման պատճառներին։
«Ակնհայտորեն չեմ կարող ասել, թե ինչ է սպասվում։ Սկզբում ասվում էր, որ Լեռնային Ղարաբաղի հարցը չլուծվելու դեպքում սահմանը չի բացվի։ Այնուհետև հայտարարեցին, որ Ղարաբաղի հարցը լուծված է։ Դրանից հետո առաջ քաշվեց Հայաստան-Ադրբեջան խաղաղության համաձայնագիրը։ Մենք այդ համաձայնագիրը բանակցեցինք․ դա բարդ և երկար գործընթաց էր, սակայն 17 կետի շուրջ հասանք համաձայնության, հանդիպեցինք ստորագրման համար, ձեռք սեղմեցինք, բայց, միևնույն է, գործընթացը չավարտվեց»,- «Ակոս»-ի հաղորդմամբ՝ հայտնել է Սիմոնյանը։
Սիմոնյանը նաև անդրադարձել է Ադրբեջանի դերակատարությանը գործընթացում։
«Ադրբեջանը, իր լոբբինգի և ազդեցության միջոցով, կարող եմ ասել, որ այս պահին խոչընդոտում է գործընթացին, որովհետև մի կողմից մեզ հետ բանակցում է, մյուս կողմից թույլ չի տալիս, որ Թուրքիան մեզ հետ բանակցի։ Սա տարօրինակ իրավիճակ է։ Թուրքիան, կարծես, դարձել է այս հարաբերությունների գերին»,- «Նոր Մարմարա»-ի համաձայն՝ նշել է ՀՀ ԱԺ նախագահը։
Հետևեք մեզ տելեգրամում
