Իրանը հայտարարել է, որ առաջին անգամ եկամուտ է ստացել Հորմուզի նեղուցով անցնող նավերից գանձվող տարանցման վճարներից։ «ՌԻԱ Նովոստի»-ի փոխանցմամբ՝ այս մասին հայտնել է Իրանի խորհրդարանի փոխնախագահ Համիդռեզա Հաջի Բաբային։ Նրա խոսքով՝ առաջին մուտքերը արդեն փոխանցվել են Իրանի կենտրոնական բանկի հաշվին։
Հայտարարությունը հնչել է այն ֆոնին, երբ Թեհրանը շարունակում է քննարկել նեղուցով անցման նոր կանոնակարգերի ներդրումը։ Մարտի վերջին Իրանի Իսլամական Հանրապետության խորհրդարանը սկսել էր համապատասխան օրինագծի մշակումը։ Նախագիծը նախատեսում է Հորմուզի նեղուցով անցման համար վճարների սահմանում իրանական ռիալով, ինչպես նաև հնարավոր սահմանափակումներ այն երկրների համար, որոնք աջակցում են Իրանի դեմ պատժամիջոցներին, այդ թվում՝ ԱՄՆ-ի և Իսրայելի, սակայն օրինագիծը դեռ չի ընդունվել։ Թեհրանը նաև հայտնել է Օմանի հետ նավարկության նոր ռեժիմ մշակելու ծրագրերի մասին, քանի որ նեղուցի մյուս հատվածը վերահսկում է Օմանը։
Ավելի վաղ իրանական «ISNA»-ն հաղորդել էր, որ Իրանը նեղուցի կառավարման արդյունքում կարող է տարեկան ստանալ մինչև 10-15 միլիարդ դոլարի եկամուտ։
Հետևեք մեզ տելեգրամում
