Շվեդիայի խորհրդարանում տեղի է ունեցել Հայոց ցեղասպանության 111-րդ տարելիցին նվիրված հիշատակի միջոցառում։ Այս մասին հայտնել է «Արմենպրես»-ը։
Շվեդիայի խորհրդարանի պատգամավոր Բյորն Սյոդերը այս մասին իր ֆեյսբուքյան էջում գրել է․ «Խորհրդարանում մենք հիշատակեցինք Օսմանյան Կայսրությունում 1915 թվականին տեղի ունեցած Հայոց ցեղասպանության տարելիցը։ Ցեղասպանության ընթացքում սպանվել է մոտ 1.5 միլիոն հայ, ինչպես նաև կայսրության այլ քրիստոնյա փոքրամասնություններ՝ ասորիներ, սիրիացիներ, քաղդեացիներ և պոնտացի հույներ: Նրանց մեծ մասը մահացել է 1915-1916 թվականներին, սակայն հալածանքներն ու սպանությունները շարունակվել են մինչև 1923 թվականը: Զոհերը կազմել են տարածքի հայ բնակչության կեսից ավելին, իսկ փրկվածների մեծ մասը փախել է երկրից: Օսմանյան կայսրությունը մեծ մասամբ դատարկվել է իր քրիստոնյա բնակչությունից»։
Պատգամավորը հիշեցրել է, որ Շվեդիայի խորհրդարանը դեռևս 2010 թվականի մարտի 11-ին պաշտոնապես ճանաչել է Հայոց ցեղասպանությունը։
Հիշատակի միջոցառման ընթացքում ելույթներով հանդես են եկել նաև Շվեդիայում Հայաստանի Հանրապետության դեսպան Աննա Աղաջանյանը և Շվեդիայի խորհրդարանի հայազգի պատգամավոր Արին Կարապետը։
Հետևեք մեզ տելեգրամում
