ԱՄՆ նախագահ Դոնալդ Թրամփը հայտարարել է, որ առաջիկա օրերին Վաշինգտոնը կարող է նոր հարվածներ հասցնել Իրանին, եթե դիվանագիտական բանակցությունները արդյունք չտան։ Սպիտակ տանը լրագրողների հետ զրույցում Թրամփը նշել է, որ Կատարի, Սաուդյան Արաբիայի և Արաբական Միացյալ Էմիրությունների առաջնորդները իրեն խնդրել են հետաձգել հարձակումը՝ վստահեցնելով, որ հնարավոր է հասնել ԱՄՆ-ի համար «ընդունելի» համաձայնության։ Նրա խոսքով՝ Իրանի դեմ նոր հարձակումը հաստատելուց ընդամենը մեկ ժամ առաջ ինքը որոշել է հետաձգել գործողությունը։
Հարցին, թե որքան ժամանակ է տալիս Թեհրանին համաձայնության հասնելու համար, Թրամփը պատասխանել է՝ «երկու կամ երեք օր»։«Գուցե ուրբաթ, շաբաթ, կիրակի կամ գալիք շաբաթասկիզբ։ Ժամանակը սահմանափակ է, որովհետև չենք կարող թույլ տալ, որ Իրանը միջուկային զենք ունենա», – ասել է ԱՄՆ նախագահը։ Միևնույն ժամանակ Թրամփը նշել է, որ հույս ունի խուսափել պատերազմից, սակայն չի բացառել նոր ռազմական հարվածների հնարավորությունը։
Իրանի զինված ուժերի ներկայացուցիչ Մոհամմադ Ակրամինիան իր հերթին հայտարարել է, որ եթե ԱՄՆ-ն վերսկսի հարձակումները, Թեհրանը «նոր ճակատներ կբացի» Միացյալ Նահանգների դեմ։
Հետևեք մեզ տելեգրամում
