Արևմուտքը քննարկում է Ռուսաստանի վրա հարձակման սցենարը․ Լավրով

Ռուսաստանի արտգործնախարար Սերգեյ Լավրովը հայտարարել է, որ Արևմուտքը Ռուսաստանի վրա հարձակման սցենարներ է քննարկում։ Այս մասին հայտնել է «ՌԻԱ Նովոստի»-ն։

Լավրովը հիշեցրել է, որ Երկրորդ համաշխարհային պատերազմից առաջ Երրորդ ռայխը իր դրոշի տակ միավորել էր գրեթե ամբողջ Եվրոպան․ «Այսօր նույն կերպ, նույն նացիստական և ռևանշիստական դրոշների ներքո ձևավորվում է համաեվրոպական հարձակողական խումբ Ռուսաստանի դեմ։ Նրանք արդեն ոչ միայն հիբրիդային մեթոդներով են գործում, այլ մտածում են նաև ֆիզիկական հարձակման մասին։ Եվ այդ խմբի ղեկավարն այսօր ոչ թե Ադոլֆ Հիտլերն է, այլ Զելենսկին՝ իր նացիստական կարգախոսներով», – ասել է Լավրովը «Детская редакция» առցանց հրատարակությանը տված հարցազրույցում։

ՌԴ ԱԳ նախարարը թեմային անդրադարձել է նաև «Եդինայա Ռոսիա» կուսակցության գլխավոր խորհրդի միջազգային համագործակցության և արտերկրում բնակվող հայրենակիցների աջակցության հանձնաժողովի նիստում։ Լավրովը նշել է, որ Հյուսիսատլանտյան դաշինքում դեռ քննարկվում է Ռուսաստանի «դեկոլոնիզացիայի» գաղափարը՝ հավելելով, որ արևմտյան երկրները փորձում են իրենց ազդեցությունն ու կարգերը հաստատել տարբեր տարածաշրջաններում, այդ թվում՝ Կենտրոնական Ասիայում, Հարավային Կովկասում և Ուկրաինայում։