ԱՄՆ նախագահ Դոնալդ Թրամփը հայտարարել է, որ Վաշինգտոնը լրացուցիչ 5000 զինվորական կտեղակայի Լեհաստանում՝ նշելով, որ այդ որոշման հարցում առանցքային դեր է խաղացել իր ջերմ հարաբերությունները Լեհաստանի նախագահ Կարոլ Նավրոցկիի հետ, ում թեկնածությունն ինքը պաշտոնապես սատարել էր նախորդ տարվա ընտրություններում։ Փոխանցում է Deutsche Welle-ն։
Լեհաստանի նախագահ Կարոլ Նավրոցկին շնորհակալություն է հայտնել ԱՄՆ նախագահին այս քայլի համար՝ Վաշինգտոնի հետ դաշինքն անվանելով Լեհաստանի և ողջ Եվրոպայի անվտանգության կարևորագույն հենասյուն, իսկ ՆԱՏՕ-ի ղեկավարն արդեն ողջունել է զորքերի տեղակայման վերաբերյալ Սպիտակ տան որոշումը։
Միաժամանակ դեռևս պարզ չէ, թե արդյոք խոսքն իսկապես լրացուցիչ բրիգադի մասին է, թե Եվրոպա ուղարկվող մարտական բրիգադի ռոտացիայի, որը Պենտագոնը չեղարկել էր մեկ շաբաթ առաջ․ պաշտպանության նախարար Փիթ Հեգսեթը հրահանգել էր կանգնեցնել մոտ 4700 զինվորից բաղկացած ստորաբաժանման մեկնումը Լեհաստան և Մերձբալթյան երկրներ՝ պատճառաբանելով, որ եվրոպական դաշնակիցները բավարար չափով չեն աջակցում ԱՄՆ-ին։
Չնայած Վաշինգտոնի կողմից Եվրոպայում ռազմական ներկայության ընդհանուր կրճատմանը, Լեհաստանի պաշտպանական գերատեսչությունից հայտնել են, որ ամերիկյան ուժերի վերատեղակայումը չի անդրադառնա իրենց երկրի վրա, և Վարշավան շարունակաբար աշխատում է ամերիկյան զորակազմի հզորացման ուղղությամբ։ «Մեկ բան հստակ է՝ Լեհաստանը հաստատ չի կորցնում այն, ինչ ուներ՝ շուրջ 10,000 զինվոր»,- CNN-ի փոխանցմամբ՝ նշել է Լեհաստանի պաշտպանության նախարար Վլադիսլավ Կոսինյակ-Կամիշը։
Հատկանշական է, որ ավելի վաղ ԱՄՆ-ն հայտարարել էր Գերմանիայից 5000 զինվորական դուրս բերելու մասին, ինչը տեղի էր ունեցել Դոնալդ Թրամփի և Գերմանիայի կանցլեր Ֆրիդրիխ Մերցի միջև ծագած հրապարակային վեճի ֆոնին, երբ Մերցը հայտարարել էր, թե Իրանը բանակցությունների սեղանի շուրջ «նվաստացնում է» Միացյալ Նահանգներին։
Հետևեք մեզ տելեգրամում
