Լոս Անջելեսում հայտնաբերվել է 4 դի, հայկական ազգանուններով, այդ թվում՝ երկու փոքրիկ երեխաներ։ Այս մասին գրում է Los Angeles Times-ը։ Չորեքշաբթի երեկոյան՝ ժամը 19։50-ի սահմաններում ոստիկանությունում ահազանգ է ստացվել, որ կրակոցներ են հնչել Նորթ Հիլզում գտնվող բնակարաններից մեկում։ Ոստիկանները տեղում հայտնաբերել են երկու մեծահասակի և երկու փոքր երեխայի՝ հրազենային մահացու վնասվածքներով։
Դեպքի առնչությամբ Լոս Անջելեսի ոստիկանությունը հայտնել է, որ տեղի ունեցածը չորս հոգանոց ընտանիքի սպանություն և ինքնասպանություն է։ Զոհերի թվում եղել է նաև ընդամենը 6 օրական երեխա։ Իրավապահ մարմինների տվյալներով՝ դեպքի վայրում հավաքված նախնական ապացույցները ցույց են տալիս, որ մայրը նախ կրակել է տղամարդու և երկու երեխաների վրա, ապա ինքնասպան եղել։
Լոս Անջելեսի շրջանի դատաբժշկական ծառայության համաձայն՝ զոհերն են՝ 6 օրական Էլլա Բասմաջյանը, 2 տարեկան Ալեք Բասմաջյանը, 31-ամյա Խաժակ Բասմաջյանը և 30-ամյա մի կին, որի անունը դեռ չի հրապարակվել, քանի դեռ ընտանիքի մյուս անդամներին չեն տեղեկացրել։
Հետևեք մեզ տելեգրամում
