ԱՄՆ-ի և Իրանի միջև շարունակվող բանակցությունների ֆոնին կողմերը փոխադարձ հարվածներ են հասցրել միմյանց ռազմական օբյեկտներին. Վաշինգտոնը օբյեկտներ է թիրախավորել Իրանի հարավում, իսկ Իսլամական հեղափոխության պահապանների կորպուսը (ԻՀՊԿ) հայտարարել է ամերիկյան ավիաբազայի ռմբակոծման մասին։
ԱՄՆ Կենտրոնական հրամանատարությունը (CENTCOM) հայտնել է, որ Պարսից ծոցի ափին իրականացված հարվածները պատասխան են եղել «իրանական ագրեսիվ գործողություններին», այդ թվում՝ միջազգային ջրերում գործող ամերիկյան MQ-1 անօդաչու թռչող սարքի խոցմանը։
CENTCOM-ի հայտարարության համաձայն՝ ամերիկյան կործանիչները ոչնչացրել են իրանական հակաօդային պաշտպանության համակարգեր, ցամաքային կառավարման կայան և երկու հարվածային անօդաչու թռչող սարք, որոնք, ըստ ԱՄՆ-ի, սպառնալիք էին ներկայացնում տարածաշրջանով անցնող նավերի համար։ Իրանի Իսլամական հեղափոխության պահապանների կորպուսն էլ հայտարարել է, որ ի պատասխան թիրախավորել է այն ավիաբազան, որն ԱՄՆ-ն օգտագործել էր Իրանի վրա հարձակում իրականացնելու համար։ Թեհրանը չի հստակեցրել, թե որ ռազմաբազայի մասին է խոսքը։
Միևնույն ժամանակ, Քուվեյթի պետական KUNA գործակալությունը հայտնել է, որ երկրի հակաօդային պաշտպանությունը որսացել է հրթիռներ և անօդաչու թռչող սարքեր։ Ըստ աղբյուրի՝ ամբողջ երկրում հնչել են տագնապի ազդանշաններ։ Լրացուցիչ մանրամասներ չեն հաղորդվում։
Հետևեք մեզ տելեգրամում
