Իսրայելի վարչապետ Բենիամին Նեթանյահուն հայտարարել է, որ զինվորականներին հրահանգել է ընդլայնել վերահսկողությունը Գազայի հատվածում՝ զբաղեցնելու պաղեստինյան տարածքի 70 տոկոսը։ Այս մասին հայտնում է Reuters-ը։
Ներկայումս իսրայելական զորքերը վերահսկում են Գազայի շուրջ 64 տոկոսը, մինչդեռ 2025-ի հոկտեմբերին ԱՄՆ միջնորդությամբ ձեռք բերված հրադադարի համաձայնությամբ նախատեսվում էր, որ նրանք պետք է հետ քաշվեին «Դեղին գծի» սահմաններ, ինչը Իսրայելի վերահսկողության տակ կթողներ տարածքի միայն 53 տոկոսը։ Պաղեստինյան կողմը նման «բուֆերային գոտիների» ընդլայնումը որակում է որպես բնակչությանը տարածքից վերջնականապես տեղահանելու Իսրայելի ռազմավարության մաս։
Նեթանյահուի այս հրահանգը հնչում է այն ֆոնին, երբ Իսրայելն ու «Համասը» հայտնվել են փակուղու մեջ՝ Գազայից իսրայելական զորքերի դուրսբերման և «Համասի» զինաթափման վերաբերյալ ամերիկյան ծրագրի շուրջ բանակցություններում։
Չնայած գործող հրադադարին՝ Իսրայելը վերջին շրջանում ակտիվացրել է Գազայում օդային հարվածները , որոնց թիրախում, ըստ Թել Ավիվի, «Համասի» հրամանատարներն են։ Պաղեստինյան կողմի փոխանցմամբ՝ միայն վերջին հարվածներից մեկի հետևանքով զոհվել է առնվազն 10 խաղաղ բնակիչ, այդ թվում՝ 5 երեխա։ Ընդհանուր առմամբ, տեղի առողջապահական մարմինների տվյալներով՝ հրադադարի հաստատումից ի վեր իսրայելական հարվածների հետևանքով զոհվել է ավելի քան 900 մարդ, մինչդեռ Իսրայելը հայտնել է նույն ժամանակահատվածում սպանված չորս զինծառայողի մասին։
Հետևեք մեզ տելեգրամում
