Եվրոպական 11 երկիր կոչ է արել խստացնել ռուսաստանցի զբոսաշրջիկների մուտքի կանոնները Շենգենյան գոտի։ Այդ մասին հայտնում է Politico-ն։
Պարբերականի տեղեկություններով՝ ԵՄ արտաքին քաղաքականության և անվտանգության հարցերով բարձր ներկայացուցիչ Կայա Կալասին և ներքին գործերի ու միգրացիայի հարցերով եվրահանձնակատար Մագնուս Բրուններին ուղղված համատեղ նամակում Բալթյան երկրների, Չեխիայի, Դանիայի, Ֆինլանդիայի, Նիդեռլանդների, Լեհաստանի, Շվեդիայի, ինչպես նաև ԵՄ անդամ չհանդիսացող Իսլանդիայի և Նորվեգիայի նախարարները պահանջել են վերանայել Ռուսաստանի նկատմամբ գործող վիզային քաղաքականությունը։
Նամակի հեղինակները պնդում են, որ Ռուսաստանի քաղաքացիները չպետք է անարգել օգտվեն եվրոպական հանգստավայրերից և անցկացնեն ամառային արձակուրդները Եվրոպայում, մինչ Ռուսաստանը շարունակում է պատերազմը Ուկրաինայում։
Միաժամանակ, ռուս զբոսաշրջիկների շրջանում հայտնի մի շարք երկրներ՝ Իսպանիան, Հունաստանը, Իտալիան և Ֆրանսիան, չեն միացել նախաձեռնությանը և չեն ստորագրել փաստաթուղթը։
Politico-ի հաղորդմամբ՝ նամակը ստորագրած երկրները նախատեսում են հարցը քննարկել նաև ՄԱԿ-ի Անվտանգության խորհրդի նիստի շրջանակներում։
Հետևեք մեզ տելեգրամում
