Իսրայելի պաշտպանության բանակը հայտնել է, որ հունիսի 8-ին հարվածներ է հասցրել Իրանի կենտրոնական և արևմտյան շրջաններում տեղակայված ռազմական թիրախներին։ Գործողության մանրամասները դեռևս չեն հրապարակվել։
Իրանական աղբյուրների փոխանցմամբ՝ մի շարք պայթյուններ են գրանցվել Թեհրանում, Թավրիզում, Սպահանում և Քարաջի շրջանում։
Միաժամանակ Axios-ը, հղում անելով ամերիկացի պաշտոնյայի, հաղորդում է, որ իսրայելական հարվածները սահմանափակ մասշտաբի են եղել։ Էսկալացիան տեղի է ունեցել Իրանի կողմից Իսրայելի տարածքին հասցված հրթիռային հարվածներից հետո։ Իրանի Իսլամական հեղափոխության պահապանների կորպուսը հայտարարել էր, որ թիրախում է եղել Իսրայելի Ռամաթ Դավիդ ավիաբազան:
Իրանի զինված ուժերի «Խաթամ ալ-Անբիա» կենտրոնական շտաբը նաև նախազգուշացրել էր, որ Իսրայելը կբախվի «ավելի կործանարար հետևանքների», եթե պատասխանի Թեհրանին։ Իր հերթին ԱՄՆ նախագահ Դոնալդ Թրամփը Թեհրանին կոչ է արել վերադառնալ բանակցությունների սեղան և հասնել համաձայնության՝ միաժամանակ հույս հայտնելով, որ Իսրայելը չի դիմի լայնածավալ պատասխան հարվածների։
Հիշեցնենք, որ մայիսի վերջին Իսրայելի վարչապետ Բենիամին Նեթանյահուն կարգադրել էր ընդլայնել ռազմական գործողությունները Լիբանանի հարավում գործող «Հեզբոլլահ» շարժման դեմ։ Իսրայելի պաշտպանության նախարարի խոսքով՝ նպատակն է վերահսկողություն սահմանել Լիտանի գետի շրջանի նկատմամբ և ապառազմականացնել այդ գոտին։
Հետևեք մեզ տելեգրամում
