Հայաստանում կայացած խորհրդարանական ընտրություններից հետո առաջին միջազգային արձագանքներից երկուսը հնչել են Վրաստանից։
Վրաստանի վարչապետ Իրակլի Կոբախիձեն դեռևս պաշտոնական արդյունքների հրապարակումից առաջ շնորհավորել է ՀՀ վարչապետ Նիկոլ Փաշինյանին՝ նրա քաղաքական ուժի ընտրական հաջողության կապակցությամբ։
«Անկեղծ շնորհավորանքներս վարչապետ Նիկոլ Փաշինյանին՝ նրա կուսակցության ընտրական հաջողության առթիվ։ Հույս ունեմ շարունակել մեր սերտ համագործակցությունը՝ ռազմավարական գործընկերության և Վրաստանի ու Հայաստանի բարեկամական հարաբերությունների ամրապնդման նպատակով՝ ի շահ մեր ժողովուրդների բարօրության», – գրել է Կոբախիձեն X սոցիալական հարթակում։
Հայաստանի ընտրություններին անդրադարձել է նաև Վրաստանի նախկին նախագահ Սալոմե Զուրաբիշվիլին։ «Հայաստան, ձեր պայքարը նաև մեր պայքարն է։ Այս ընտրությունները կորոշեն ձեր ժողովրդավարական եվրոպական ապագան։ Մենք ձեզ հետ ենք», – նշել է Զուրաբիշվիլին X-ում հրապարակած գրառման մեջ։
Հետևեք մեզ տելեգրամում
