Եվրամիությունը հաջորդ շաբաթ նախատեսում է Վրաստանի հետ քննարկել վիզային ազատ ռեժիմի հնարավոր ժամանակավոր կասեցման հարցը։ Այս մասին հայտնել է «Ազատություն» ռադիոյի եվրոպական գրասենյակի խմբագիր Ռիկարդ Յոզվիակը՝ իր X սոցիալական հարթակում։
Նրա խոսքով՝ հանդիպումը նախատեսված է հունիսի 11-ին և կկենտրոնանա վիզային լիբերալիզացիայի հնարավոր կասեցման մեխանիզմների քննարկման վրա։
Միաժամանակ նշվում է, որ դեկտեմբերին Եվրահանձնաժողովը կհրապարակի տարեկան զեկույցը Վրաստանի կողմից վիզային ռեժիմի պահանջների կատարման վերաբերյալ, իսկ դրա հիման վրա ԵՄ անդամ երկրները հունվարին կորոշեն հետագա կարգավորումները։
Վրաստանի ԱԳՆ-ն հաստատել է, որ հանդիպումը կայանալու է Եվրահանձնաժողովի հրավերով՝ ընդգծելով, որ այն նախատեսված է անցկացնել երկխոսության ձևաչափով։
Հիշեցվում է, որ ավելի վաղ ԵՄ-ն արդեն մասամբ սահմանափակել էր Վրաստանի համար վիզային ազատ ռեժիմը՝ դիվանագիտական և ծառայողական անձնագրերի կրողների համար՝ կապված ժողովրդավարության և մարդու իրավունքների ոլորտում խախտումների վերաբերյալ մտահոգությունների հետ։
Բրյուսելը նաև զգուշացրել է, որ եթե իրավիճակը չբարելավվի, սահմանափակումները կարող են ընդլայնվել և տարածվել նաև սովորական քաղաքացիների վրա։
Հետևեք մեզ տելեգրամում
