Քուվեյթի նավթային պետական ընկերության (KPC) միջազգային մարքեթինգի ղեկավար Շեյխ Խալեդ Ահմադ Ալ-Սաբահի գնահատմամբ՝ Հորմուզի նեղուցի վերագործարկումից հետո երկրի նավթարդյունահանումը կարող է արագ վերականգնվել։ Նրա խոսքով՝ մոտավորապես 70%-ի չափով արտադրության վերականգնումը հնարավոր կլինի 6-8 շաբաթվա ընթացքում, իսկ մնացած ծավալների լիարժեք վերականգնման համար կպահանջվի ևս շուրջ մեկ ամիս։
Ալ-Սաբահը նշել է, որ զուգահեռաբար Քուվեյթը քննարկումներ է վարում գործընկեր երկրների հետ՝ նոր խողովակաշարային ուղղությունների զարգացման շուրջ՝ ընդգծելով, որ ներկայիս ճգնաժամը ցույց է տալիս այլընտրանքային ենթակառուցվածքների կարևորությունը։ KPC-ի ներկայացուցիչը հավելել է նաև, որ նավթավերամշակման հատվածը կարող է վերադառնալ բնականոն աշխատանքի ավելի արագ՝ մոտ 2-3 շաբաթում:
Մասնագետների գնահատմամբ՝ Պարսից ծոցի նավթավերամշակման գործարանները կարող են մեծացնել իրենց արտադրողականությունը մինչև իրենց հզորության մոտ 90–95%-ը՝ 40-ից 60 օրվա ընթացքում, եթե իրավիճակը կայունանա։ Միևնույն ժամանակ շուկայի այլ ներկայացուցիչներ նշում են, որ Հորմուզի նեղուցով լիարժեք նավագնացության վերականգնումը կարող է ավելի երկար ժամանակ պահանջել՝ կախված քաղաքական համաձայնություններից և անվտանգային իրավիճակից։
Հետևեք մեզ տելեգրամում
