Լարված իրավիճակ է ստեղծվել Անկարայում՝ Թուրքիայի Ազգային մեծ ժողովի շենքի մոտ, որտեղ միաժամանակ հավաքվել են ընդդիմադիր «Ժողովրդահանրապետական կուսակցության» (CHP) տարբեր թևերի կողմնակիցները: Այս մասին հայտնում է «Արմենպրես»-ը՝ հղում տալով թուրքական ԶԼՄ-ներին։
Ըստ հաղորդումների՝ իրավիճակը սրվել է այն բանից հետո, երբ կուսակցության ներսում երկու հակադիր քաղաքական գործիչներ՝ Քեմալ Քըլըչդարօղլուն և Օզգյուր Օզելը, հայտարարել են, որ պատրաստվում են ելույթ ունենալ նույն օրը և նույն ժամին՝ կուսակցության խորհրդարանական խմբակցության նիստում։ Ժամը 13:00-ին նախատեսված նիստերի համընկնումը հանգեցրել է կողմնակիցների զանգվածային հավաքների թե՛ խորհրդարանի շենքի մոտ, թե՛ կուսակցության կենտրոնակայանի շրջակայքում։ Ոստիկանությունը մի քանի անգամ կանխել է անվտանգության պատնեշները ճեղքելու փորձերը, ինչի պատճառով խորհրդարանի տարածքը ժամանակավորապես փակվել է այցելուների համար։
Իրավիճակի սրման ֆոնին Քեմալ Քըլըչդարօղլուն որոշել է խմբակցության նիստը տեղափոխել կուսակցության կենտրոնական գրասենյակ՝ նշելով, որ այդ քայլը կատարվել է Անկարայի քաղաքապետ Մանսուր Յավաշի դիմումից հետո։ Նա ընդգծել է, որ չի ցանկանում դառնալ «կեղտոտ խաղերի գործիք» և կոչ է արել խուսափել ներքին բախումներից։ Միաժամանակ Օզգյուր Օզելի կողմնակիցները հավաքվել են խորհրդարանում՝ պնդելով, որ նա շարունակում է մնալ կուսակցության լեգիտիմ ղեկավար և պետք է ունենա խմբակցության նիստում ելույթ ունենալու իրավունք։
Լարվածության հիմքում, ըստ թուրքական աղբյուրների, մայիսին կայացված դատական որոշումն է, որով անվավեր է ճանաչվել 2023 թվականի CHP-ի համագումարը, և ժամանակավորապես վերականգնվել են Քըլըչդարօղլուի լիազորությունները՝ մինչև վերջնական դատական որոշում։ Կուսակցության ներսում իրավիճակը շարունակում է մնալ անորոշ, իսկ կողմերի միջև բանակցությունները դեռ ընթանում են՝ բախումներից խուսափելու նպատակով։ Վերլուծաբանների կարծիքով՝ CHP-ում խորացող ճգնաժամը կարող է ազդեցություն ունենալ Թուրքիայի ընդդիմադիր դաշտի քաղաքական հավասարակշռության վրա։
Հետևեք մեզ տելեգրամում
