Կրեմլը դեռ չի շնորհավորի Փաշինյանին․ սպասում են ընտրությունների վերջնական գնահատականներին

Ռուսաստանի նախագահի խոսնակ Դմիտրի Պեսկովը հայտարարել է, որ Կրեմլը դեռ չի պատրաստվում շնորհավորել ՀՀ վարչապետ Նիկոլ Փաշինյանին՝ ընտրություններում հաղթելու կապակցությամբ։ «Մենք գերադասում ենք սպասել Հայաստանի ընտրությունների մասին պաշտոնական արդյունքներին», – նշել է նա՝ ընդգծելով, որ գործընթացում դեռ կան բազմաթիվ հարցեր և չպարզաբանված հանգամանքներ։

Ռուսական կողմը, ըստ Պեսկովի, արդեն իսկ տեսել է հաղորդագրություններ հնարավոր խախտումների մասին, ինչն էլ, նրա խոսքով, լրացուցիչ պատճառ է՝ զերծ մնալ շտապ քաղաքական գնահատականներից։ Միաժամանակ Կրեմլում ավելի վաղ էլ ընդգծել էին, որ Ռուսաստանը առայժմ ձեռնպահ է մնում ընտրությունների արդյունքների վերաբերյալ մեկնաբանություններից և հետևում է գործընթացի զարգացումներին։

ՌԴ ԱԳՆ խոսնակ Մարիա Զախարովան էլ հայտարարել է, որ Մոսկվան ապագա հարաբերությունները Հայաստանի հետ կկառուցի՝ կախված Երևանի հետագա քաղաքական քայլերից՝ միաժամանակ նշելով, որ Ռուսաստանը շահագրգռված է տեսնել «ուժեղ և ինքնիշխան Հայաստան»։ Նրա խոսքով՝ ընտրություններից հետո Հայաստանի հասարակության մեջ առկա բևեռացվածությունը պետք է հաշվի առնել, հակառակ դեպքում միակողմանի որոշումները «կարող են խորացնել սոցիալ-քաղաքական լարվածությունը երկրում»։