Վրաստանի և Ադրբեջանի միջև ձեռք բերված նոր համաձայնությամբ՝ Վրաստանը նախկինի պես տարեկան 500 միլիոն խորանարդ մետր գազ կստանա ադրբեջանական կողմից։ Այս մասին հայտարարել է Վրաստանի վարչապետ Իրակլի Կոբախիձեն՝ պարզաբանելով Բաքվի հետ թարմացված պայմանագրի պայմանները։
Խոսքը երկու երկրների միջև բնական գազի մատակարարման 20-ամյա ռազմավարական պայմանագրի մասին է, որի ժամկետն ավարտվում էր այս տարի և ավելի վաղ երկարաձգվել էր ևս 20 տարով։ Վարչապետի պարզաբանմամբ՝ նոր համաձայնությամբ 500 միլիոն խորանարդ մետր ծավալը չի փոխվել, և գազի գինը մնալու է նույն արտոնյալ՝ սոցիալական սակագնով, ինչը թույլ կտա կայուն պահել Վրաստանի բնակչության և ջերմաէլեկտրակայանների համար սահմանված ներքին սակագները։
Լրագրողների այն հարցին, թե արդյո՞ք Վրաստանը պատրաստվում է զիջել Հարավկովկասյան գազատարում («Շահ Դենիզ» խողովակաշար) իր բաժնեմասը, որպեսզի Ադրբեջանն ավելի շատ գազ ուղղի դեպի Եվրամիություն, Կոբախիձեն ուղղակի պատասխան չի տվել։ Նա միայն նշել է, որ Բաքվի հետ բանակցությունները վերաբերել են գազի ներկրման բոլոր երեք հիմնական ուղղություններին, ներառյալ «Շահ Դենիզ» նախագիծը, և արդյունքում երկրի համար երաշխավորված ծավալներն ավելացել են։
Նշենք, որ պաշտոնական վիճակագրության համաձայն՝ 2025-ին Վրաստանն ընդհանուր առմամբ սպառել է 3,172 միլիարդ խորանարդ մետր գազ, որի հիմնական մասն ապահովել է Ադրբեջանը։ Բաքվից ներկրվել է 2,27 միլիարդ խորանարդ մետր գազ, ինչը նախորդ տարվա համեմատ 1.6%-ով պակաս է: Այս ծավալից 666 միլիոնը կազմել է ուղղակի ներկրումը, 1,371 միլիարդը՝ լրացուցիչ պայմանագրերը, իսկ 235 միլիոն խորանարդ մետրը ստացվել է Հարավկովկասյան տարանցիկ գազատարից:
Միևնույն ժամանակ, ռուսական գազի ներկրումը կայուն աճ է գրանցել։ Վրաստանը Ռուսաստանից գնել է 886 միլիոն խորանարդ մետր գազ, ինչը 12%-ով ավել է նախորդ տարվա ցուցանիշից՝ կազմելով Վրաստանում գազի ընդհանուր սպառման շուրջ 28%-ը:
Հետևեք մեզ տելեգրամում
