«Արաս» ազատ տնտեսական գոտու հանրային կապերի վարչությունը հայտնել է, որ Հայաստանի հետ սահմանին գտնվող «Նորդուզ» մաքսակետի կարգավիճակը բարձրացվել է մինչև «գլխավոր վարչության» մակարդակի։ Փոխանցում են իրանական ԶԼՄ-ները:
Կարգավիճակի փոփոխության համաձայն՝ այսուհետ էականորեն կընդլայնվեն Նորդուզի կառավարչական ու գործառնական լիազորությունները։ Վարչական և որոշումների կայացման բազմաթիվ գործընթացներ, որոնք նախկինում պահանջում էին վերադաս մարմինների հաստատումը, այսուհետ կիրականացվեն հենց սահմանին։ Լիազորությունների նման ապակենտրոնացումը թույլ կտա զգալիորեն արագացնել մաքսային ձևակերպումները, կրճատել սահմանին բեռնատարների կայանման ժամանակը և դյուրացնել այս ուղիով իրականացվող արտահանման ու ներմուծման ողջ շղթան։
Բացի այդ, ավելի վաղ Իրանի մաքսային ծառայության համաձայնությամբ «Նորդուզի» մաքսակետը սահմանվել էր որպես մասնագիտացված մաքսատուն՝ տարբեր տեսակի ապրանքների ներմուծման ձևակերպումների իրականացման համար։ Հրապարակված պաշտոնական ծանուցման համաձայն՝ այս սահմանով գրեթե բոլոր ապրանքների ներմուծումն իրականացվելու է մասնագիտացված կարգով, և միայն բջջային հեռախոսների ներմուծումն է բացառություն կազմում այս ընթացակարգից։
«Այս սահմանը, լինելով Իրանի Իսլամական Հանրապետության և Հայաստանի Հանրապետության միջև միակ համատեղ ցամաքային սահմանը, առանցքային դեր է խաղում ապրանքների տարանցման և ԵԱՏՄ անդամ երկրների հետ Իրանի տնտեսական կապերի հարցում»,- ընդգծել են իրանական ԶԼՄ-ները՝ հավելելով, որ նոր փոփոխությունները կնպաստեն Հայաստանի և ԵԱՏՄ անդամ երկրների հետ առևտրաշրջանառության ծավալի մեծացմանը, ինչպես նաև տարածաշրջանային առևտրային միջանցքներում Իրանի դերի ուժեղացմանը:
Հետևեք մեզ տելեգրամում
