Եվրամիությունը պատրաստվում է հրատապ կարգով տնտեսական օգնություն տրամադրել Հայաստանին՝ մեղմելու ռուսական կողմից ՀՀ ապրանքների ներմուծման սահմանափակումների հետևանքները: Այս մասին հայտնում է Financial Times պարբերականը:
Ըստ պարբերականի՝ Եվրահանձնաժողովը այսպես կոչված «ինքնավար առևտրային միջոցներ» է մշակում, որոնք կնվազեցնեն հայկական պարենային և գյուղատնտեսական ապրանքների արտահանման մաքսատուրքերը։ «Հիմա ժամանակն է, որ մենք քայլ անենք, աջակցենք նրանց և ցույց տանք, որ կարող ենք լինել հուսալի գործընկեր», – FT-ին հայտնել է ծրագրին տեղյակ պաշտոնյաներից մեկը։
Եվրահանձնաժողովի մամուլի քարտուղար Օլոֆ Գիլը հաստատել է, որ նոր միջոցները նպատակ ունեն օգնել հայկական բիզնեսին մուտք գործել ԵՄ շուկա և աջակցել տնտեսության ամենախոցելի հատվածներին։ Աղբյուրների փոխանցմամբ՝ ԵՄ նոր արտոնությունները կընդգրկեն ռուսական արգելքի տակ հայտնված 20 ապրանքատեսակների մեծ մասը, որոնց տարեկան արտահանման արժեքը կազմում է շուրջ 420 միլիոն եվրո։
Նախագիծը, որը դեռ պետք է արժանանա ԵՄ անդամ երկրների մեծամասնության և Եվրախորհրդարանի հավանությանը, կարող է պաշտոնապես ներկայացվել առաջիկա շաբաթների ընթացքում։ Զուգահեռաբար, հուլիսի սկզբին Հայաստան է ժամանելու ԵՄ ընդլայնման հարցերով եվրահանձնակատար Մարտա Կոսը։
Հոդվածում նշվում է, որ ԵԱՏՄ-ին Հայաստանի անդամակցությունը Մոսկվային թույլ է տալիս խեղդող օղակում պահել երկրի արտահանումն ու ներմուծումը, ինչը նաև բարդեցնում է ԵՄ-ի կողմից Երևանի հետ արտոնյալ առևտրային գործարքների կնքումը։
FT-ն ընդգծում է, որ հայկական արտահանման առանցքային ճյուղերից մեկի՝ կոնյակի համար արտոնություններ սահմանելը որոշակի բարդություններ է առաջացրել Եվրահանձնաժողովում՝ հաշվի առնելով Ֆրանսիայի համար սեփական կոնյակի արտադրության պաշտպանության կարևորությունը։ Բացի այդ, դեպի ԵՄ արտահանման գլխավոր խոչընդոտներից է մնում դեպի ծով ելք չունեցող Հայաստանից փչացող ապրանքների տեղափոխման լոգիստիկան՝ Վրաստանի կամ Թուրքիայի տարածքով։
«Տարածաշրջանային հետազոտությունների կենտրոնի» ղեկավար Ռիչարդ Կիրակոսյանը պարբերականի հետ զրույցում նշել է, որ ԵՄ նախորդ աջակցությունն ապացուցեց, որ ռուսական մարտավարությունը հակառակ արդյունքն է տալիս։ Այդուհանդերձ, փորձագետը զգուշացրել է, որ Հայաստանի առևտրում Ռուսաստանի ունեցած հսկայական դերի պատճառով ԵՄ առաջարկվող քայլերը կլինեն միայն «ժամանակավոր կամ սահմանափակ»՝ ծառայելով որպես իրավիճակային լուծում, որը բավարար չէ ռուսական տնտեսական գերիշխանությունը լիովին չեզոքացնելու համար։
Հետևեք մեզ տելեգրամում
