ՆԱՏՕ-ն հակաօդային պաշտպանության համակարգ կտեղակայի Թուրքիայի Քոնյա նահանգում

Թուրքիայի օդային տարածքի անվտանգության ուժեղացմանն ուղղված միջոցառումների շրջանակում ՆԱՏՕ-ն նախատեսում է հակաօդային պաշտպանության համակարգ տեղակայել Թուրքիայի Քոնյա նահանգում։

Այս մասին հայտնում է թուրքական «TRT Haber» հեռուստաալիքը՝ նշելով, որ որոշումը կայացվել է տարածաշրջանում պահպանվող լարվածության պայմաններում՝ ՆԱՏՕ-ի անդամ երկրների հետ համակարգված աշխատանքի արդյունքում։ Նշվում է, որ համակարգի տեղակայումը նպատակ ունի բարձրացնել սպառնալիքների վերահսկման և դրանց արձագանքման Թուրքիայի հնարավորությունները։ Սակայն համակարգի տեսակի և տեղակայման կոնկրետ ժամկետների մասին մանրամասներ չեն հաղորդվում։

Թուրքիայի ազգային պաշտպանության նախարարությունը նախկինում հայտնել էր օդային պաշտպանության միջոցառումների ուժեղացման և տարածաշրջանային իրավիճակի շուրջ ՆԱՏՕ-ի հետ խորհրդակցությունների մասին։ Հիշեցնենք, որ այս տարվա մարտին Թուրքիայի Մալաթիա նահանգում արդեն տեղակայվել էր «Patriot» զենիթահրթիռային համակարգ՝ երկրի հակաօդային և հակահրթիռային պաշտպանությունը ամրապնդելու նպատակով։