«ՀԱՄԱՍ» շարժումը պատրաստ է իր զինանոցը փոխանցել միայն պաղեստինյան իշխանություններին և երբեք այն չի հանձնի Իսրայելին, ԱՄՆ-ին կամ նրանց հետ կապված որևէ կառույցի։ Այս մասին «ՌԻԱ Նովոստի»-ին տված հարցազրույցում հայտարարել է շարժման քաղբյուրոյի նախագահի տեղակալ Մուսա Աբու Մարզուկը։
«Զենքը կարող է փոխանցվել միայն պաղեստինյան կողմին՝ լինի դա Պաղեստինյան ազգային վարչակազմը, թե այն պաղեստինյան պետությունը, որը կստանձնի Գազայի հատվածի կառավարումը»,- ասել է նա։
Աբու Մարզուկի խոսքով՝ պաղեստինյան խմբավորումների զինաթափման հարցը քաղաքական բնույթ ունի, և դրա համար անհրաժեշտ է հստակ քաղաքական հեռանկար, որը, նրա կարծիքով, բացակայում է ԱՄՆ նախագահ Դոնալդ Թրամփի՝ Գազայի կարգավորման ծրագրում։ Նա զգուշացրել է, որ հակառակ դեպքում դա կարող է հանգեցնել քաոսի։
«Տարբեր երկրների փորձը ցույց է տալիս, որ Գազայի հատվածը վերահսկող ուժի զինաթափումը կարող է հանգեցնել քաղաքացիական պատերազմի կամ քաոսի առաջացման»,- նշել է ՀԱՄԱՍ-ի ներկայացուցիչը։
Աբու Մարզուկը հիշեցրել է նաև Իրաքի փորձը, երբ ԱՄՆ ուժերը լուծարեցին իրաքյան բանակն ու ոստիկանությունը, ինչը, նրա խոսքով, հանգեցրեց քաոսի, քաղաքացիական պատերազմի և ահաբեկչական խմբավորումների տարածմանը։
Հետևեք մեզ տելեգրամում
