Իսրայելի վարչապետ Բենիամին Նեթանյահուն հայտարարել է, որ իսրայելական զորքերը կպահպանեն իրենց ներկայությունը Հարավային Լիբանանում՝ երկրի հյուսիսային շրջանները «Հեզբոլլահի» հարձակումներից պաշտպանելու համար: Փոխանցում են իսրայելական ԶԼՄ-ները:
«Մենք հասել ենք հսկայական նվաճումների, և չենք հրաժարվի դրանցից: Մենք կմնանք հարավային Լիբանանի անվտանգության գոտում այնքան ժամանակ, որքան անհրաժեշտ է՝ հյուսիսի սիրելի բնակիչներին և Իսրայելի բոլոր քաղաքացիներին «Հեզբոլլահի» հարձակումներից պաշտպանելու համար»,- ընդգծել է Նեթանյահուն:
Իսրայելի վարչապետի հայտարարությանն արձագանքել է «Հեզբոլլահի» առաջնորդ Նաիմ Քասեմը՝ շեշտելով, որ Լիբանանում Իսրայելի ներկայությունը բացառվում է, և որևէ «անվտանգության գոտի» գոյություն ունենալ չի կարող։ Ըստ նրա՝ ինքնիշխանության պահպանման համար պատասխանատու է միայն Լիբանանի ազգային բանակը, որի հետ իրենք համագործակցում են։
Միևնույն ժամանակ, իրանական «Tasnim» գործակալությունը հայտնել է, որ Թեհրանը կդադարեցնի ԱՄՆ-ի հետ բոլոր բանակցությունները, եթե Իսրայելը դուրս չգա Հարավային Լիբանանից: Իրանական կողմի պնդմամբ՝ առանց Վաշինգտոնի հետ կնքված նախնական հուշագրի 1-ին կետի կատարման (բոլոր ճակատներում պատերազմի դադարեցում և Լիբանանի տարածքային ամբողջականության ապահովում), երկխոսությունն անիմաստ է:
Նշենք, որ Լիբանանի հարավում Իսրայելը գրավել է մոտ 602 քառակուսի կիլոմետր տարածք, որը կազմում է Լիբանանի տարածքի մոտ 6%-ը։ Այդ տարածքները Թել Ավիվը «անվտանգության գոտի» է համարում:
Հետևեք մեզ տելեգրամում
