Հունիսի 21-ին Հորմուզի նեղուցով անցել է ընդամենը 12 նավ, մինչդեռ նախորդ օրը՝ 35: Ինչպես փոխանցում է «Ալ-Ջազիրան»՝ հղում անելով «Windward» ընկերության տվյալներին, նեղուց մուտք գործած նավերից հինգն անջատել են իրենց ավտոմատ նույնականացման համակարգերը։
Նավերի հոսքի նվազումն արձանագրվել է այն բանից հետո, երբ նույն օրն ավելի վաղ իրանական կողմը հայտարարել էր նեղուցը փակելու մտադրության մասին՝ ի պատասխան Լիբանանում Իսրայելի գործողությունների: Թեև ԱՄՆ Կենտրոնական հրամանատարությունը (CENTCOM) հերքել էր նեղուցի փաստացի շրջափակումը՝ պնդելով, որ անվտանգ նավարկությունը պահպանվում է, ստեղծված անորոշությունը ստիպել էր նավերին դիմել անվտանգության լրացուցիչ միջոցների և անջատել տեղորոշման համակարգերը։
Լարվածության ֆոնին, հունիսի 21-ին Շվեյցարիայում կայացած Իրան-ԱՄՆ բանակցությունների ընթացքում կողմերը պայմանավորվել են ձևավորել ուղիղ կապի խողովակ՝ 60-օրյա անցումային շրջանում Հորմուզի նեղուցում միջադեպերից խուսափելու և առևտրային նավերի անվտանգ ու անվճար անցումն ապահովելու նպատակով։
Նշենք, որ Հորմուզի նեղուցը համարվում է համաշխարհային էներգետիկ շուկայի կարևորագույն ծովային ուղիներից մեկը, որով անցնում է աշխարհում սպառվող նավթի և հեղուկացված բնական գազի մոտ 20 տոկոսը։
Հետևեք մեզ տելեգրամում
