Ռուսական զորքերը ներթափանցել են Ուկրաինայի արևելքում գտնվող Կոնստանտինովկա քաղաք և փորձում են շրջափակել այն, հաղորդում է BBC-ն՝ հղում անելով ուկրաինացի զինվորականների տվյալներին։ Ուկրաինական կողմի ներկայացուցիչների խոսքով՝ իրավիճակը դեռևս վերահսկելի է, սակայն քաղաքում արդեն ակտիվ են ռուսական ստորաբաժանումները։
Ուկրաինայի 19-րդ կորպուսի հրամանատար Օլեքսանդր Բակուլինը նշել է, որ Կոնստանտինովկայում կա մոտ 130 ռուս զինծառայող։ Ուկրաինացի զինվորականները BBC-ին հայտնել են, որ քաղաքը մասամբ վերածվել է այսպես կոչված «մոխրագույն գոտու», որտեղ կողմերից ոչ մեկը լիարժեք վերահսկողություն չունի։ Նրանց խոսքով՝ ռուսական ուժերը շարունակում են ներթափանցել քաղաք և աստիճանաբար ընդլայնել ներկայությունը։
Նշենք, որ Կոնստանտինովկան ունի ռազմավարական կարևորություն, քանի որ այն ճանապարհ է դեպի Կրամատորսկ և Սլավյանսկ քաղաքներ, որոնց գրավմամբ՝ Կրեմլը կմոտենա Դոնբասի նկատմամբ ամբողջական վերահսկողություն հաստատելուն:
Հետևեք մեզ տելեգրամում
