Առողջապահության համաշխարհային կազմակերպությունը (WHO) հայտնել է, որ Եվրոպայում շարունակվող աննախադեպ շոգի հետևանքով արձանագրվել է ավելի քան 1,300 ավել մահ։
Կազմակերպության ղեկավար Թեդրոս Ադհանոմ Գեբրեյեսուսը նշել է, որ մահերը կապված են բարձր ջերմաստիճանի հետ, որը գրանցվել են հունիսի 21-ից սկսած։ Նրա խոսքով՝ շոգը հաճախ կոչվում է «լուռ մարդասպան», իսկ Եվրոպայի տները, աշխատավայրերը և դպրոցները այսպիսի ջերմաստիճանների համար չեն նախագծվել։ Միաժամանակ, Ֆրանսիայի առողջապահական ծառայությունները հայտնել են, որ վերջին օրերին երկրում գրանցվել է մոտ 1,000-ից ավել մահ՝ սովորական ցուցանիշի համեմատ։ Մահացածների մեծ մասը տարեցներ են։
Շոգը ռեկորդներ է սահմանել նաև այլ երկրներում․ Գերմանիայում ջերմաստիճանը հասել է 41.7°C-ի, Լեհաստանում՝ 40.5°C-ի, իսկ Չեխիայում՝ 41.1°C-ի։
Մասնագետների խոսքով՝ Եվրոպան համարվում է աշխարհում ամենաարագ տաքացող տարածաշրջաններից մեկը, որտեղ գլոբալ տաքացման հետևանքով նման շոգային ալիքները դառնում են ավելի հաճախակի։ Տարբեր երկրներում արդեն ձեռնարկվում են սահմանափակումներ՝ առողջական ռիսկերը նվազեցնելու համար, այդ թվում՝ միջոցառումների չեղարկում և հանրային տարածքներում որոշ արգելքներ։
Հետևեք մեզ տելեգրամում
