Հուլիսի 2-ին Ստամբուլի օդանավակայանում ձերբակալվել է թուրք հայտնի ստենդափեր Դենիզ Գյոքթաշը՝ YouTube-ում տեղադրված ելույթի պատճառով։ 32-ամյա կատակերգուի դեմ մի քանի քրեական գործ է հարուցվել՝ «կրոնական արժեքները հրապարակայնորեն վիրավորելու» և «նախագահ Ռեջեփ Թայիփ Էրդողանին անարգելու» մեղադրանքներով։ Այս մասին հայտնում է Euronews-ը:
Հունիսի 24-ին հրապարակված տեսանյութն արդեն մոտ 9 միլիոն դիտում ունի։ Ելույթում Գյոքթաշը Ղուրանի վերաբերյալ կատակներ է արել, Էրդողանին անվանել է բռնապետ, ծաղրել Թուրքիայի քաղաքական դաշտի գրեթե բոլոր կողմերին, այդ թվում՝ Էրդողանի կալանավորված մրցակից, Ստամբուլի քաղաքապետ Էքրեմ Իմամօղլուին։
Ստամբուլի դատախազությունը հայտնել է, որ ստենդափերի ելույթի դեմ քաղաքացիներից 185 բողոք է ստացել։ Մինչ ձերբակալությունը Թուրքիայի իշխանությունները X սոցցանցում արգելափակել են ելույթի կարճ հոլովակները:
Այս ձերբակալությունը տեղի է ունենում Թուրքիայի կառավարության կողմից իրականացվող լայնածավալ ճնշումների ֆոնին։ Վերջին շրջանում իրավապահները հաճախ են քրեական գործեր հարուցում այն երաժիշտների, արվեստագետների ու լրագրողների դեմ, ովքեր քննադատում են իշխանություններին կամ պահպանողական արժեքները։
Հետևեք մեզ տելեգրամում
