Մոսկվայի քաղաքապետ Սերգեյ Սոբյանինը հայտնել է, որ հուլիսի 6-ի երեկոյից Մոսկվայի ուղղությամբ ավելի քան 430 անօդաչու թռչող սարք է շարժվել։ Նրա խոսքով՝ հակաօդային պաշտպանության ուժերն անօդաչուների մեծ մասը ոչնչացրել են դեռևս մայրաքաղաքին մոտենալու ճանապարհին։ Փոխանցում է «Մեդուզան»:
Ըստ Սոբյանինի՝ Մոսկվայի մերձակայքում խոցվել է 36 ԱԹՍ։ Հարձակման ֆոնին գիշերվա ընթացքում սահմանափակումներ են մտցվել մայրաքաղաքի չորս օդանավակայաններում՝ «Շերեմետևո», «Դոմոդեդովո», «Վնուկովո» և «Ժուկովսկի»։
ՌԴ պաշտպանության նախարարությունից հայտնել են, որ գիշերվա ընթացքում երկրի տարբեր շրջանների երկնքում հակաօդային պաշտպանության ուժերը խոցել են ընդհանուր 452 ուկրաինական անօդաչու թռչող սարք։
Միաժամանակ հաղորդվել է Բելգորոդի մարզի ուղղությամբ հրթիռային հարձակման մասին։ Մարզի ժամանակավոր պաշտոնակատար Ալեքսանդր Շուվաևի հաղորդմամբ՝ հարվածների մեծ մասը չեզոքացվել է, սակայն քաղաքացիական ենթակառուցվածքներ են վնասվել, զոհվել է մեկ, վիրավորվել՝ երեք մարդ:
Հիշեցնենք, որ Ռուսաստանը հուլիսի 6-ի վաղ առավոտյան հրթիռային և անօդաչու թռչող սարքերի զանգվածային հարձակում էր իրականացրել Ուկրաինայի դեմ, որի հետևանքով զոհվել է առնվազն 22 մարդ:
Հետևեք մեզ տելեգրամում
