Թուրքիայի փոխնախագահ Ջևդեթ Յըլմազը հայտարարել է, որ Անկարայում Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի հանդիպման ընթացքում կքննարկվեն տարածաշրջանային, գլոբալ և երկկողմ հարցեր, ինչպես նաև Հարավային Կովկասում ընթացող զարգացումները։ Այս մասին հայտնում են ադրբեջանական ԶԼՄ-ները։
«Հարավային Կովկասը մեծ նշանակություն ունի։ Հայաստանի և Ադրբեջանի միջև առկա խնդիրները հիմնականում լուծվել են։ Այժմ մենք գտնվում ենք խաղաղության համաձայնագրի ստորագրմանը շատ մոտ փուլում»,- ասել է Թուրքիայի փոխնախագահը։
Թուրքիայի փոխնախագահը հավելել է, որ «Անկարան ակտիվ ջանքեր է գործադրում ինչպես Ադրբեջանի և Հայաստանի միջև կայուն խաղաղության հաստատման, այնպես էլ Թուրքիայի և Հայաստանի հարաբերությունների լիարժեք կարգավորման ուղղությամբ»։
«Այս հարցում մենք Միացյալ Նահանգների հետ նմանատիպ մոտեցումներ ենք կիսում։ Այդ պատճառով էլ բնական է, որ Հարավային Կովկասի թեման քննարկվելու է Էրդողան-Թրամփ հանդիպման ընթացքում»,- նշել է Ջևդեթ Յըլմազը։
Հիշեցնենք, որ ԱՄՆ նախագահն Անկարա է մեկնել ՆԱՏՕ-ի գագաթնաժողովին մասնակցելու նպատակով:
Հետևեք մեզ տելեգրամում
