Հուլիսի 7-ին Թրամփի վարչակազմը չեղարկել է պատժամիջոցների այն բացառությունը, որով նախկինում թույլատրվել էր իրանական նավթի և նավթաքիմիական արտադրանքի վաճառքը։ ԱՄՆ ֆինանսների նախարարության հրապարակած նոր փաստաթղթի համաձայն՝ բոլոր այն գործարքները, որոնք արտոնված էին նախորդ թույլտվությամբ, պետք է դադարեցվեն և ամբողջությամբ փակվեն մինչև հուլիսի 17-ը։
Այս արտոնությունը ԱՄՆ-ի և Իրանի միջև ամիսներ տևած պատերազմական գործողություններից հետո ստորագրված փոխըմբռնման հուշագրի առանցքային մաս էր, և Թեհրանին հնարավորություն էր տալիս նավթ վաճառել մինչև օգոստոսի 21-ը։
ԻԻՀ ԱԳՆ-ն արձագանքել է այս որոշմանը՝ այն անվանելով փոխըմբռնման հուշագրի 10-րդ կետի կոպիտ խախտում: Իրանի արտաքին գերատեսչությունը շեշտել է, որ Թեհրանը կձեռնարկի ցանկացած քայլ, որն անհրաժեշտ կհամարի իր ազգային շահերի և անվտանգության պաշտպանության համար:
Հիշեցնենք, որ Հորմուզի նեղուցում Թեհրանի կողմից առևտրային նավերի թիրախավորումից հետո ԱՄՆ-ն հարվածներ է հասցրել Իրանի հարավին, ինչին ի պատասխան՝ ԻՀՊԿ-ն ամերիկյան օբյեկտներ է թիրախավորել Բահրեյնում ու Քուվեյթում:
Հետևեք մեզ տելեգրամում
