Հուլիսի 13-ին Եմենի պաշտպանության նախարարությունը հայտնել է, որ հարվածել է հութիների վերահսկողության տակ գտնվող մայրաքաղաք Սանայի միջազգային օդանավակայանի թռիչքուղուն, որպեսզի թույլ չտա իրանական ինքնաթիռի վայրէջքը։
Ըստ Եմենի կառավարության՝ Թեհրանը թռիչքները կարող է օգտագործել ռազմական անձնակազմի տեղափոխման համար, և չնայած նախազգուշացումներին՝ իրանական կողմը «փորձել է խախտել Եմենի օդային տարածքը», ինչին հետևել են ավիահարվածները։ Հութներին պատկանող լրատվամիջոցները, սակայն, հարձակման մեջ մեղադրում են Սաուդյան Արաբիային։
Եմենի տեղեկատվության նախարարը նաև հայտնել է, որ հութիները նույն օդանավակայանում կալանավորել են Կարմիր խաչի միջազգային կոմիտեի ինքնաթիռն ու պատանդ են պահում դրա օդաչուներին։
Հիշեցնենք, որ հութիների «Անսար Ալլահ» շարժումը Եմենի միջազգայնորեն ճանաչված կառավարության դեմ պատերազմում է 2015 թվականից։ Խմբավորումը վերահսկում է մայրաքաղաք Սանան և երկրի հյուսիսային հատվածի մեծ մասը, ներառյալ Կարմիր ծովի ափին գտնվող ռազմավարական կարևոր նշանակություն ունեցող Հոդեյդա նավահանգստային քաղաքը։ Իսկ պաշտոնական կառավարությունը տեղակայվել է Ադենում և վերահսկում է երկրի հարավային շրջանները։
Հետևեք մեզ տելեգրամում
