TRIPP երթուղու շրջանակում սահմանային անվտանգության և մաքսային բոլոր գործառույթները կմնան Հայաստանի վերահսկողության ներքո։ Այս մասին ԱՄՆ պետդեպարատմենտից հայտնել են՝ ի պատասխան «Ազատության» հարցմանը։
Հարցումն ուղարկվել է այն բանից հետո, երբ Հայաստանի փոխարտգործնախարարն օրեր առաջ հայտարարել էր, որ Սյունիքի մարզով Ադրբեջանը Նախիջևանին կապող TRIPP երթուղին գործելու է ԵԱՏՄ տարանցման կանոնակարգերին համապատասխան։ «Ազատությունը» հետաքրքրվել էր, թե արդյոք ԱՄՆ-ն, որպես նախաձեռնության մասնակից, համաձայնել է, որ երթուղին գործի ԵԱՏՄ կարգավորող շրջանակի ներքո, և արդյոք մաքսային տարանցման ընթացակարգերը կիրականացվեն այդ կանոններով։
Պատասխանում Պետդեպարտամենտը նշել է, որ «TRIPP-ը լիովին հարգում է Հայաստանի ինքնիշխանությունը, տարածքային ամբողջականությունը և իրավազորությունը։ Սահմանային անվտանգության և մաքսային բոլոր գործառույթները մնում են Հայաստանի վերահսկողության ներքո, իսկ վերահսկողությունն ու առանցքային որոշումները շարունակում են իրականացնել Հայաստանի իշխանությունները»։
Հետևեք մեզ տելեգրամում
