Իրանի նախկին նախագահ Մահմուդ Ահմադինեժադի գրասենյակը հերքել է շրջանառվող այն տեղեկությունները, թե Իսրայելի արտաքին հետախուզությունը (Մոսադ) գաղտնի կապեր է հաստատել նրա հետ՝ իշխանափոխության դեպքում վերջինիս Իրանի ղեկավար կարգելու նպատակով։
«Iran International»-ի փոխանցմամբ՝ նախկին նախագահի գրասենյակը հայտարարել է, որ «The New York Times» պարբերականի հրապարակած նյութը հորինվածք է, իսկ դրանում տեղ գտած պնդումները՝ «հոլիվուդյան ոճի հայտարարություններ»։ Գրասենյակը նաև հերքել է Ահմադինեժադի տնային կալանքի տակ գտնվելու մասին լուրերը՝ շեշտելով, որ նա շարունակում է իր ամենօրյա բնականոն աշխատանքը։
Զուգահեռաբար, իսրայելական 14-րդ ալիքի եթերում Մոսադի նախկին բարձրաստիճան պաշտոնյա Սագի Ասուլինը քննադատել է այս գործողության մանրամասների հանրայնացումը՝ նշելով, որ եթե տեղեկություններն իրական են, ապա նման արտահոսքը կարող է լրջորեն վնասել հետախուզական աղբյուրներին ու պետական անվտանգությանը, ինչպես նաև վտանգել հենց Ահմադինեժադին Իրանի ներսում։
Այս արձագանքները հաջորդել են «The New York Times»-ի այն աղմկահարույց հրապարակմանը, ըստ որի՝ Մոսադը մի քանի տարի գաղտնի կապ է պահպանել Ահմադինեժադի հետ՝ նախապատրաստվելով Իրանում հնարավոր իշխանափոխությանը։ Ըստ թերթի աղբյուրների՝ շփումները սկսվել են 2022 թվականին, երբ Իսրայելում եզրակացրել են, որ նախկին նախագահի հարաբերությունները երկրի հոգևոր էլիտայի հետ վատթարացել են։
Թերթը նշել էր, թե Իրանի նախկին նախագահը ֆինանսական և լոգիստիկ աջակցություն է ստացել արտասահմանյան ուղևորությունների համար և գաղտնի հանդիպումներ ունեցել Բուդապեշտում, որտեղ 2024 թվականին նրան անձամբ հանդիպել է նաև Մոսադի ղեկավար Դավիթ Բարնեան։ Հրապարակման համաձայն՝ Իսրայելն Ահմադինեժադին դիտարկել է որպես ապագա անցումային շրջանի հնարավոր առաջնորդ, սակայն 2026 թվականի փետրվարին՝ Իրան-ԱՄՆ-Իսրայել պատերազմի մեկնարկին, նախագծի վերջին փուլը ձախողվել է։ Թեհրանում Ահմադինեժադի նստավայրին հասցված իսրայելական հարվածից հետո հետախուզությունը նրան տեղափոխել է անվտանգ վայր, սակայն, ըստ հրապարակման, նախկին նախագահը կորցրել է վստահությունը ծրագրի հանդեպ և հրաժարվել իշխանության վերադառնալու առաջարկից։
Հետևեք մեզ տելեգրամում
