ԱՄՆ նախագահ Դոնալդ Թրամփը Սպիտակ տանը Լիբանանի նախագահ Ժոզեֆ Աունի հետ հանդիպումից հետո հայտարարել է, որ Վաշինգտոնը շարունակելու է աջակցել Լիբանանին և կվերականգնի ԱՄՆ-ից այդ երկիր ուղիղ ավիաչվերթները։ Այս մասին հայտնել է «The Associated Press»-ը։
«Լիբանանի հետ շատ վատ են վարվել, սակայն մենք ցանկանում ենք, որ այդ երկիրը ստանա այն հարգանքը, որին արժանի է։ Մենք շատ ենք օգնելու Լիբանանին»,- հայտարարել է Թրամփը՝ չմանրամասնելով, թե ինչ աջակցություն է նախատեսվում։
Հանդիպումից ժամեր անց ԱՄՆ նախագահը սոցիալական ցանցում հայտնել է, որ իր վարչակազմին հանձնարարել է թույլատրել ամերիկյան ավիաընկերություններին վերականգնել Լիբանան ուղիղ չվերթները։ Դրանք դադարեցվել էին 1985 թվականին՝ TWA Flight 847 ինքնաթիռի առևանգումից հետո։
Հանդիպման ընթացքում քննարկվել է նաև Իսրայելի և Լիբանանի միջև հունիսի 26-ին ԱՄՆ միջնորդությամբ ձեռք բերված շրջանակային համաձայնագրի իրականացումը, որը նախատեսում է իսրայելական զորքերի փուլային դուրսբերում Լիբանանի հարավից և «Հեզբոլլահ»-ի զինաթափում։
Թրամփը հայտարարել է, որ իսրայելական ուժերը «գտնվում են դուրսբերման գործընթացում», սակայն մանրամասներ չի ներկայացրել։
Իր հերթին Լիբանանի նախագահ Ժոզեֆ Աունը բարձր է գնահատել Թրամփի նախաձեռնությունները՝ նշելով, որ նրա տեսլականը խաղաղությունն է և այն կդառնա նրա քաղաքական ժառանգությունը։
Չնայած դրան՝ տեղում իրավիճակը շարունակում է մնալ լարված։ Լիբանանի և Իսրայելի զինվորականները տարբեր գնահատականներ են տվել փորձնական գոտիներում զորքերի տեղակայման և իսրայելական ուժերի դուրսբերման վերաբերյալ, իսկ լիբանանյան բանակը հայտնել է, որ իր ստորաբաժանումների տեղակայման ընթացքում իսրայելական զինվորականները նախազգուշական կրակ են բացել։
Հետևեք մեզ տելեգրամում
