ՀԱՄԱՍ-ի պատվիրակությունը մեկնել է Կահիրե՝ Գազայի հատվածում հրադադարի համաձայնագրի երկրորդ փուլի իրականացման շուրջ բանակցությունները շարունակելու համար։ Այս մասին հայտնում է «Palestine Chronicle»-ը։
ՀԱՄԱՍ-ի հայտարարության համաձայն՝ պատվիրակությունը հանդիպումներ կունենա Եգիպտոսի պաշտոնյաների, ինչպես նաև Եգիպտոսից, Կատարից և Թուրքիայից միջնորդների հետ։ Նախատեսվում են նաև քննարկումներ պաղեստինյան տարբեր խմբավորումների և քաղաքական ուժերի ներկայացուցիչների հետ։ Ըստ աղբյուրի` բանակցությունների ընթացքում կողմերը կքննարկեն հրադադարի պահպանման և համաձայնագրով ստանձնած պարտավորությունների կատարման հարցերը, ինչպես նաև դրա երկրորդ փուլին անցնելու հնարավորությունը։ Քննարկումների առանցքում կլինի նաև Գազայի հատվածում ստեղծված հումանիտար իրավիճակը։
ՀԱՄԱՍ-ն Իսրայելին մեղադրում է հրադադարի պայմանավորվածությունները բազմիցս խախտելու, Գազայի տարբեր հատվածներում հարձակումները շարունակելու և մարդասիրական օգնության մուտքը սահմանափակելու մեջ։
Բանակցությունները տեղի են ունենում նաև Գազայի հետպատերազմյան կառավարման վերաբերյալ նոր առաջարկների ֆոնին։ Իսրայելական լրատվամիջոցների հաղորդմամբ՝ քննարկվում է այսպես կոչված «Խաղաղության խորհրդի» և միջազգային ուժերի ներգրավմամբ կառավարման փորձնական ծրագիր, որի շրջանակում Գազայի՝ ՀԱՄԱՍ-ի վերահսկողությունից դուրս գտնվող տարածքները կարող է կառավարել պաղեստինյան տեխնոկրատական հանձնաժողովը՝ միջազգային ուժերի աջակցությամբ։
Հետևեք մեզ տելեգրամում
