Դանուբի մակարդակի իջեցման հետևանքով ջրի երես են դուրս եկել Երկրորդ աշխարհամարտից մնացած ռազմանավերը

Եվրոպայի երկրորդ ամենաերկար գետի՝ Դանուբի ջրի մակարդակը սաստիկ շոգ եղանակի պատճառով ռեկորդային ցածր ցուցանիշի է հասել։ Ջրի ցամաքման հետևանքով ի հայտ են եկել Երկրորդ աշխարհամարտի տարիներին նացիստական Գերմանիայի տասնյակ խորտակված ռազմանավեր։ Այս մասին հայտնում է Associated Press-ը:

Սերբիայի և Ռումինիայի սահմանին գտնվող Պրահովո նավահանգստի մոտակայքում ջրի երես են դուրս եկել ռազմանավերի ժանգոտված կորպուսներն ու կոտրված կայմերը։ Այս նավերը պատկանել են նացիստական Գերմանիայի Սևծովյան նավատորմին. 1944 թվականի սեպտեմբերին գերմանացիներն իրենց իսկ որոշմամբ խորտակել են շուրջ 200 ռազմանավ՝ Բալկաններում խորհրդային զորքերի առաջխաղացումը դանդաղեցնելու նպատակով։

Ռազմանավերի մի մասը դեռևս բեռնված է զինամթերքով ու պայթուցիկներով։ Թեև ժամանակին դրանց մի մասը դուրս է բերվել գետից, մեծ մասը մնացել է ջրի տակ:

Դանուբի ջրի մակարդակի կտրուկ իջեցումը վտանգում է գետով նավագնացությունը, և Սերբիայի իշխանությունները՝ ԵՄ ֆինանսական աջակցությամբ, փորձում են լուծել նավերի մնացորդների հեռացման հարցը։ Գետի ռեկորդային ցամաքումը նաև լուրջ ճգնաժամ է առաջացրել տարածաշրջանում. էլեկտրակայանները հայտնվել են անջատման վտանգի տակ, իսկ Կենտրոնական ու Արևելյան Եվրոպայի երկրներում էլեկտրաէներգիան խնայելու համար հոսանքի մատակարարման սահմանափակումներ են մտցրել։